Un catálogo recompila a colección de arte do Parlamento de Galicia, con máis de 300 obras contemporáneas

Un novo catálogo recompila as máis de 300 obras, fundamentalmente de pintura e escultura, de artistas do século XX e XXI que se exhiben nas dependencias do Parlamento de Galicia, "unha das coleccións máis variadas e valiosas" da arte galega contemporánea.

O Pazo do Hórreo acolleu este xoves o acto de presentación deste traballo no que se inclúe información sobre as pinturas, esculturas, fotografías, documentos, reposteros, vidreiras e medallas que conforman esta colección.

E é que nos corredores e dependencias do Lexislativo galego pódense ver pezas como 'Paixase metafísica' de Urbano Lugrís, 'Figuras' de Laxeiro, 'Escea de xénero' de Francisco Lloréns, 'Catedral' de Carlos Maside, 'O can azul' de Xaime Quessada ou 'Esfera cromática' de Menchu Lamas. Ademais, a Cámara tamén alberga a 'Carta xeométrica de Galicia', de Domingo Fontán.

"Unha das máis variadas e valiosas colecciones da arte contemporánea galega", destacou o presidente do Parlamento, Miguel Santalices, no acto de presentación do catálogo, ao que asistiron moitos dos autores das pezas que acolle a Cámara, así como autoridades como os conselleiros de Cultura e Sanidade, Román Rodríguez e Jesús Vázquez Almuiña, respectivamente.

Na súa intervención, Santalices subliñou o "compromiso e respaldo explícito do poder lexislativo ao universo creativo galego" e explicou que a publicación do volume "vai máis aló do labor editorial", "xa que se enmarca nunha estratexia máis ampla que inclúe a catalogación, xestión, ordenación e conservación da colección seguindo criterios museísticos".

Para este labor, segundo indicou, a Cámara conta co asesoramento da Real Academia Galega de Belas Artes, cuxo presidente Manuel Quintana Martelo, puxo en valor a "pluralidade, calidade e claridade" dunha colección que "ofrece unha visión da arte contemporáneo de Galicia".

Pola súa banda, o profesor Francisco Javier Limia Gardón, autor do catálogo, definiu o volume como "un libro dedicado" a todas as persoas que traballan na Cámara galega, aos parlamentarios, así como a todos os interesados na beleza que se expresa desde as obras. "Todos podemos ser axentes activos para contribuír e divulgar este elenco artístico", apuntou.

EXPOSICIÓN NAS CIDADES

No acto, ademais, o conselleiro de Cultura e Turismo, Román Rodríguez lanzou "o reto" de levar unha selección das pezas que alberga a Cámara ás distintas cidades para que "todos os galegos poidan achegarse a coñecer unha das coleccións artísticas e culturais máis importantes de Galicia".

"Nesta colección hai moita calidade artística, pictórica, escultórica, moito talento", manifestou o conselleiro nunha intervención na que agradeceu o labor realizado polo presidente da Cámara, Miguel Santalices por abrir o Parlamento á cidadanía.

Pola súa banda, o xefe da Cámara asegurou recoller a "luva" lanzada polo conselleiro e mostrou a súa disposición a facilitar a exhibición de pezas do Parlamento de Galicia nas urbes galegas.