«Debemos reivindicar o espazo que nos dá identidade»

Mèdol, o Centro de Artes Contemporáneas de Tarragona, expón a mostra Despois do incendio, do artista galego Eduardo Valiña a cal se poderá visitar no espazo Les Golfes de Casa Canals ata o 25 de maio.

Despois do incendio é un relato visual marcado por unha intrínseca relación co medio dende unha visión crítica. Valiña interpela directamente o público a través de imaxes e instalacións trasladadas ao espazo expositivo como testemuño das tensións medioambientais e culturais, nun diálogo coa estética da perda e da resistencia.

O artista documenta en pezas creadas para este proxecto, tensións medioambientais resultantes de ameazas como a masificación do turismo ou controvertidos proxectos industriais, como a gran fábrica de celulosa proxectada en Palas de Rei, Altri.

Na súa primeira antolóxica en Cataluña, Valiña foi comisariado por Freya Day dentro do programa Cultura Verda. “Debemos reivindicar o espazo que nos dá identidade, no meu caso a periferia, antes de que desapareza”, explica o artista galego, que, con motivo da exposición en Mèdol, creou unha instalación que evoca este debate arredor de Tarragona. O artista instalou un banco con vistas ao polígono petroquímico norte e gravou a persoas observando a paisaxe, ao estilo dos bancos que se fixeron populares entre os cazadores de selfies. A peza resultante, The best bank in the world, pode verse en Les Golfes de Casa Canals.

A concelleira de Cultura do Concello de Tarragona, Sandra Ramos, subliña “a importancia de acoller en Mèdol proxectos que cuestionen o noso presente e nos conviden a repensar o noso papel na transformación da paisaxe”. Pola súa parte, o director de Mèdol, Vicent Fibla, destaca que Despois do incendio “sitúanos nun espazo de diálogo entre a natureza e a creación contemporánea, facéndonos conscientes da fraxilidade do territorio e de como a arte pode ser unha ferramenta para a memoria e a resistencia”.

A exposición poderá visitarse de martes a sábado en horario de 10 a 13 h e de 17 a 20 h, e os domingos e festivos de 11 a 14 h. A entrada é gratuíta.

Eduardo Valiña

Eduardo Valiña (O Páramo, Lugo), licenciado en Historia da Arte pola Universidade de Santiago de Compostela, é un destacado artista visual e comisario comprometido co panorama artístico contemporáneo galego. A súa traxectoria levouno a expoñer en espazos de referencia coma o Museo Barjola de Gijón, o Museo Provincial de Lugo e en cidades coma Porto, Lisboa, Bruxelas, Bucarest e A Habana. Na actualidade traballa como Conservador xefe da Fundación Eugenio Granell de Santiago de Compostela.

O seu traballo creativo non se sitúa na periferia da práctica artística, senón no centro dun discurso que enlaza a produción cultural coa experiencia. Dende a súa contorna inmediata, Valiña activa unha conversa con problemáticas universais sen desligarse do seu lugar de enunciación. A súa obra non responde a unha narrativa de perda ou de denuncia, senón a un proceso de sedimentación no que a identidade e a natureza se entrelazan nun equilibrio complexo.