A Xunta rexenera máis de 3 millóns de M2 de superficie marisqueira
O labor realizarase polo sector para mellorar a produción das súas zonas de traballo
Santiago. A Consellería do Mar subvenciona a rexeneración de máis de tres millóns de metros cadrados de superficie de bancos marisqueiros ao abeiro das convocatorias de 2022 para mellorar a produtividade de zonas de marisqueo e á protección dos seus ecosistemas. O traballo será realizado polo propio sector no marco dos 45 proxectos aprobados pola Xunta para este fin por 1,4 millóns e que se desenvolverán este ano e o que vén.
Os apoios baixo os que se realizan estas tarefas son, por unha banda, os destinados a proxectos para a conservación e restauración da biodiversidade e dos ecosistemas mariños no marco de actividades marisqueiras sostibles, cofinanciados polo Fondo Europeo Marítimo e da Pesca.
Tamén apoian labores deste tipo as achegas dirixidas a proxectos de rexeneración que permitan mellorar a produtividade dos bancos marisqueiros con problemas de perda de produción, financiadas integramente con fondos propios da comunidade autónoma.
Así o detalla o informe analizado onte no Consello da Xunta sobre a resolución das convocatorias deste ano. Este texto reflicte que na maioría da superficie obxecto dos labores de rexeneración realizaranse tarefas de remoción de substrato para impulsar a reprodución dos seres mariños.