Santiago
+15° C
Actualizado
sábado, 28 noviembre 2020
19:49
h

Camiñada en Santiago en repulsa da violencia machista

Participaron cargos da Xunta // Feijóo súmase cun vídeo en Twitter, no que receita a “vacina” da educación contra esta “enfermidade social”

SANTIAGO. EP. Unha trintena de persoas, entre elas cargos da Xunta e membros do Parlamento galego, participaron este domingo na VIII ruta 'Camiño ao Respecto' entre o Monte do Gozo e a Praza do Obradoiro, en Santiago de Compostela, para manifestar a súa repulsa contra a violencia de xénero e non dar "nin un paso atrás" na loita contra esta lacra.

Na comitiva, encabezada pola conselleira de Emprego e Igualdade, María Jesús Lorenzana, e o vicepresidente primeiro da Xunta, Alfonso Rueda, estiveron tamén outros membros do Goberno galego como o titular de Sanidade, Julio García Comesaña, o de Medio Rural, José González, e a secretaria xeral de Igualdade, Susana López Abella; ademais do presidente do Lexislativo autonómico, Miguel Ángel Santalices, e deputados.

En declaracións aos medios á súa chegada ao Obradoiro, a conselleira de Emprego e Igualdade lembrou que esta marcha se celebra todos os anos o domingo anterior ao 25 de novembro, Día Internacional contra a Violencia Machista. Con todo, nesta ocasión o grupo de participantes tivo que ser "moi reducido" debido ás circunstancias da pandemia.

Por isto mesmo, tal e como explicou Lorenzana, o seu departamento promoveu a difusión 'online' da iniciativa 'Camiño ao Respecto', para que "todos os cidadáns que se queiran sumar" poidan facelo a través da súa propia andaina de cinco quilómetros nos seus respectivos municipios.

Así, animou a que os galegos se descarguen o dorsal da campaña na web da Xunta, fagan esta ruta con el e compartan en redes sociais unha fotografía ou un vídeo co hashtag '#CamiñoAoRespecto', entre este domingo e o próximo 30 de novembro.

FEIJÓO PARTICIPA 'ONLINE'

De feito, un dos participantes nesta iniciativa 'online' foi o propio presidente galego, Alberto Núñez Feijóo, quen compartiu no seu perfil de Twitter un vídeo camiñando polo parque do Monte do Gozo e animando a "facer unha gran andaina colectiva" en Galicia contra a violencia machista.

"Temos unha pandemia e estou convencido de que a superaremos. Pero temos outra, é unha pandemia que é unha enfermidade social, a violencia de xénero, e ademais ten unha vacina: a educación", manifestou.

No mesmo vídeo, o presidente da Xunta apelou a "seguir traballando" contra este problema, "seguir apoiando" ás vítimas e "ser implacables" contra os maltratadores. "Cada quilómetro conta, cada palabra conta, cada decisión conta e contamos con todos vós para seguir traballando por unha Galicia sen violencia machista", concluíu Feijóo.

RECORDO A MANUELA E CLARA

Ao finalizar a camiñada deste domingo, a conselleira de Igualdade tamén tivo palabras para lembrar a Manuela e Clara, as dúas galegas que neste 2020 foron vítimas mortais da violencia de xénero. Tras mandar "unha aperta" ás súas familias, dirixiuse á sociedade no seu conxunto para asegurar que "calquera acto é pouco mentres siga existindo unha soa muller" que sofre esta lacra.

Ademais, lembrou que "detrás" de cada vítima mortal "hai moito máis": "Hai que pensar nos nenos e nas nenas e na circunstancia tan terrible non só da morte da súa nai, senón da morte da súa nai moitas veces a mans do seu pai".

MANIFESTO DA XUNTA

Ao comezo da ruta, no Monte do Gozo, María Jesús Lorenzana deu lectura ao manifesto da Xunta polo 25N, no que se expón que as dúas mulleres asasinadas en Galicia este ano son só "punta do gran iceberg que supón a violencia machista", a cal sofren "miles" de persoas, tamén "nenos e nenas", e que supón un "gravísimo atentado contra os seus dereitos máis elementais".

Neste texto, o Goberno galego lembra ás mulleres asasinadas e aos orfos que deixan, pero tamén a aqueles nenos que son "vítimas mortais" dalgúns destes crimes.

O manifesto da Xunta tamén asegura que parte do traballo na súa erradicación debe focalizarse sobre os maltratadores, para que sobre eles "caia todo o peso da lei, da xustiza e do rexeitamento social". "Todas as medidas son suficientes mentres unha muller viva baixo o medo e a falta de liberdade que iso supón, e calquera balance será negativo mentres haxa unha soa muller asasinada por esta causa", leu Lorenzana.

Non en balde, tamén recalcou que a Administración galega, ante a emerxencia da covid-19, traballou "desde o minuto 1 na posta en marcha dun plan de reforzo" na atención ás vítimas "que garantise a súa seguridade, tratando que as medidas habilitadas mitigasen a situación de illamento e que as mulleres se sentisen acompañadas e protexidas".

"A igualdade é un valor de Estado, a violencia de xénero un asunto de Estado e a erradicación desta violencia un deber de Estado, xa que a violencia machista constitúe o máis cruel expoñente da falta de igualdade na nosa sociedade e un dos ataques máis flagrantes aos dereitos fundamentais das persoas, como son a liberdade, a igualdade e a vida", engadiu a conselleira, facendo letura do manifesto.

22 nov 2020 / 16:04
Noticia marcada para leer más tarde en Tu Correo Gallego
TEMAS
Tema marcado como favorito
Selecciona los que más te interesen y verás todas las noticias relacionadas con ellos en Mi Correo Gallego.