Cultura protexe a biblioteca de Pardo Bazán ao incoarse o BIC
Publicouse no DOG o expediente para a declaración, pero a tutela é inmediata // A Real Academia Galega mostra satisfacción ao cumprirse a súa demanda
Coa publicación este mércores no Diario Oficial de Galicia do expediente de incoación para declarar como Ben de Interese Cultural (BIC) a biblioteca da condesa Emilia Pardo Bazán, aplicarase de xeito provisional o réxime de tutela previsto na Lei do Patrimonio Cultural de Galicia e, polo tanto, a protección dun total de 10.855 volumes da colección da escritora.
Ao respecto a Real Academia Galega manifesta a súa satisfacción pola publicación da resolución da Dirección Xeral do Patrimonio Cultural, e agarda que este paso permita ademais reunir en breve o conxunto deste patrimonio bibliográfico na súa sede, na rúa Tabernas 11 da Coruña, no que foi o fogar da escritora, e poñelo a disposición da comunidade investigadora.
A Consellería de Cultura informa que a declaración como BIC afecta a 7.883 libros que están custodiados na sede da Real Academia Galega (RAG), mentres que 2.972 rexistros continúan no interior das Torres de Meirás. Ademais, a resolución contempla a posibilidade de que a este número poidan sumarse outros que, segundo a documentación achegada pola RAG na súa solicitude, poderían estar actualmente en localizacións descoñecidas.
Por outra banda, o expediente recolle que todos os libros pertencentes a esta biblioteca posúen un cuño de cor vermella cumprimentado a man coa situación topográfica dos exemplares, encargado polo primoxénito da escritora, que permite reconstruír a colocación dos volumes nas diferentes estancias do edificio. Este cuño corresponde a un ficheiro alfabético organizado por autores e almacenado na biblioteca da planta baixa das Torres de Meirás.
“É unha excelente noticia que a Xunta recoñeza a demanda da Real Academia Galega a prol da consideración da biblioteca de Pardo Bazán como ben de interese cultural. Protexemos deste xeito un patrimonio de todos os galegos e do que a RAG é depositaria”, manifestou o seu presidente, Víctor Freixanes.
Con todo, recoñece a preocupación da Academia pola situación dos fondos bibliográficos da condesa que ficaron nas Torres de Meirás. “Eses libros tamén forman parte do patrimonio intelectual da autora, e a RAG reivindica os seus libros, que forman parte da intrahistoria, a crónica intelectual de Emilia Pardo Bazán, coa memoria dos seus autores preferidos”, salientou Freixanes.
Pola súa banda, Marilar Aleixandre, representante da RAG na Xunta Pro-Devolución do Pazo e coordinadora da programación que en 2021 recordará á autora co gallo do centenario do seu pasamento, sinalou que “a valía destes volumes é sobre todo a información sobre as lecturas e os intereses de Emilia Pardo Bazán, autodidacta que loitou toda a súa vida para que as mulleres puidesen cursar estudos de secundaria e universitarios, o que non ocorreu en España até 1910”.
• Será o mércores, 2 de decembro. O Xulgado de Primeira Instancia número 1 da Coruña fixou unha nova data para a celebración da vista sobre as medidas cautelares relacionadas co pazo de Meirás. A letrada da Administración de Xustiza así o determinou, ao presentarse unha petición por parte da Avogacía do Estado e co “fin de dilucidar conxuntamente as medidas cautelares interesadas”, así como as cuestións expostas pola familia Franco. Por elo o xulgado acordou adiar e fixar a vista para o mércores 2 de decembro, ás 13 horas, no antigo edificio da Audiencia Provincial da Coruña, situado na rúa Capitán Juan Varela.
• Estaba prevista este venres. O Xulgado, ante a oposición da familia Franco á medida cautelar que lle prohibe retirar bens do pazo de Meirás e que os ordena inventariar, fixara inicialmente a vista para este venres ás 10 horas.
A Coruña. O Concello de Sada celebrou a incoación do expediente de declaración de BIC á biblioteca de Emilia Pardo Bazán, xa que lle outorga de inmediato a tutela e protección. Máis solicita tamén que os volumes existentes nas Torres de Meirás mantéñanse nelas no futuro.
Considérase desde o consistorio sadense que é unha Biblioteca representativa da vida e obra dunha escritora de referencia na cultura do noso país, precursora feminista e defensora dos dereitos das mulleres. Que se publique no DOG o día da violencia contra das mulleres é unha oportuna coincidencia, manifesta nun comunicado.
O alcalde de Sada, Benito Portela, entende que “é fundamental dotar dun grao de protección á biblioteca de Emilia Pardo Bazán, unha escritora de referencia” pero tamén sinala que a incoación BIC, “é fundamental para a integridade do Pazo como sitio histórico”. Nese senso, o Concello de Sada lamenta que na resolución se omitise a referencia ao BIC do Pazo, coa categoría de sitio histórico, cando foi precisamente iso un dos fundamentos para tal declaración BIC no ano 2008.
Unha omisión que o Concello entende involuntaria, pero que non debe afectar á localización orixinaria en Meirás da integridade da biblioteca da condesa. Por elo, tanto continente como contido deben preservar e salvagardar a súa integridade, polo que o alcalde de Sada entende que “a biblioteca
de Pardo Bazán non debe saír do Pazo de Meirás”. “Nin agora nin no futuro”, conclúe Portela. m.a.