Morre unha persoa en Touro ao saírse o seu vehículo da estrada

Unha persoa faleceu este domingo no municipio coruñés de Touro logo de saírse o vehículo que conducía da estrada, ao seu paso pola parroquia de Loxo. Segundo informou o 112 Galicia, ás 11,00 horas deste domingo, un particular contactaba co servizo para informar da saída de vía dun vehículo que circulaba pola AC-240, ao redor do punto quilométrico 15. Indicaba ademais que o condutor e único ocupante do vehículo xa fora evacuado do seu interior, pero requiría asistencia sanitaria. O 112 deu aviso entón ao persoal do Servizo de Urxencias Sanitarias de Galicia-061, que derivaron ao lugar o helicóptero medicalizado con base en Santiago de Compostela. De feito, a aeronave chegou a aterrar moi preto do lugar dos feitos, pero non se puido facer nada. Ademais, foron informados de inmediato os Bombeiros de Arzúa, os axentes de Tráfico e os efectivos da Agrupación de Voluntarios de Protección Civil da localidade.