O BNG promete un ano “de esforzos” para sacar adiante o país

A portavoz nacional do BNG, Ana Pontón, asegurou este mércores que, tras un ano “moi difícil”, a súa formación en 2021 non escatimará “esforzos” para sacar o país adiante.

Nun vídeo remitido aos medios, a líder da oposición fai un chamamento á “esperanza” de cara ao novo ano e agradece a “xenerosidade” e a “responsabilidade” coa que os galegos afrontaron o 2020.

No seu discurso do Nadal, Pontón traslada un compromiso e unha mensaxe de esperanza en nome do BNG e asegura que no seu partido “non escatimaremos esforzos para sacar o país adiante” porque “imos traballar para que Galicia non perda o tren da reactivación económica e social, con propostas en positivo, arrimando o ombreiro e coa man tendida para superar esta crise”.

As palabras de Pontón para o novo ano buscan ser “unha mensaxe de esperanza, de confianza en nós, como país e como pobo” porque Galicia sairá da situación actual “máis pronto que tarde”.

“Somos un país con recursos e somos un pobo traballador, con talento e con orgullo”, remarca a portavoz do BNG ao longo dos máis de tres minutos do vídeo que o BNG difundiu a través das súas redes sociais.

Na gravación, Pontón envía un recordo ás persoas falecidas polo virus, “unha ferida aberta e a cara máis dolorosa desta crise, e por iso estarán sempre na nosa memoria; para eles, para elas, un abrazo infinito de agarimo”, expresa.

A continuación, recoñece o traballo “de quen estivo e aínda está na primeira liña contra a covid, arriscando a súa saúde para coidar da nosa”, das que moitas son mulleres “con empregos precarios e pouco valorados” pero que son “as imprescindibles”.

Pontón tamén fai referencia á xente nova, á que agradece a súa responsabilidade despois de que a anterior crise afectase os seus soños e proxectos e agora soportan “a pandemia, que mesmo limita as ganas de saír e gozar que son propias da mocidade”.

“Tedes todo o dereito a querer divertirvos sen sentirvos culpables, e por iso agradecemos a vosa responsabilidade, as vosas renuncias para coidarnos: grazas por esa xenerosidade”, sinala.

Finalmente, envía unha mensaxe aos colectivos máis impactados economicamente pola crise nun momento “en que hai miles de galegos e galegas que perderon os seus empregos, miles de persoas autónomas que pecharon os seus negocios, moitas outras que fan números para aguantar, e familias preocupadas polo futuro dos seus fillos”.

Todos eles necesitan que Galicia reciba os recursos imprescindibles para a reactivación económica e social e, ese será “o obxectivo do BNG” durante todo o ano porque a comunidade debe recibir o que lle corresponde para “construír un país xusto, no que vivir e traballar”. “Entre todos e todas faremos que 2021 sexa un ano cargado de futuro”, conclúe Ana Pontón.

SANTIAGO. EFE