O novo plan galego contra incendios reduce de 71 a 28 as parroquias de risco

SANTIAGO. EP. O plan de prevención e defensa contra os incendios de Galicia (Pladiga) para este 2020 reduce un 60 por cento, de 71 a 28, o número das chamadas parroquias de alta actividade incendiaria (PAAI), que son as máis vulnerables ante os lumes forestais, e contempla a adquisición por parte da Xunta de dous novos avións que subirán a dotación aérea para a extinción até un total de 28 aeronaves.

Así o avanzou este venres o presidente galego, Alberto Núñez Feijóo, na comparecencia posterior á reunión do seu Executivo na que se deu a coñecer o novo Pladiga antes da súa remisión ao Consello Forestal. Así, a previsión que manexa é que "no mesmo mes de maio" --posiblemente, a próxima semana-- o Goberno autonómico o aprobe de forma definitiva.

Ademais da baixada das parroquias de risco, unha das novidades deste plan será a compra de dous avións por parte da Xunta, que farán un total de 28 aeronaves que traballarán para a extinción dos incendios forestais na Comunidade: 11 por parte do Goberno estatal e 17 por parte do autonómico. Así mesmo, incrementarase nun total de dez o número de drones utilizados en tarefas de vixilancia.

O Pladiga do 2020 prevé a intervención de máis de 7.000 persoas en total, que reúne tanto aos profesionais propios da Administración autonómica, como aos adscritos e a outras institucións. "Todos eles terán á súa disposición 360 motobombas", engadiu Feijóo, á vez que avanzou que a Xunta adquirirá 11 novas e cederá outras cinco a distintos concellos galegos.

Respecto do persoal, ratificou que o plan deste ano aumenta a seis meses os contratos de "máis de 1.000" traballadores temporais fixos-descontinuos para as tarefas de extinción. Neste sentido, lembrou que en 2018 e 2019 estes profesionais estiveron no terreo un cinco meses.

PLAN DE PREVENCIÓN DE 30 MILLÓNS

Ademais, o Pladiga 2020 conta coa novidade de que inclúe un plan de prevención dotado de máis de 30 millóns de euros que foi aprobado en Consello hai 15 días. Esta folla de ruta inclúe traballos preparativos en case 46.000 hectáreas e 5.800 quilómetros de pistas forestais e estradas.

Nestes labores preventivos, que xa se iniciaron o pasado luns e que se prolongarán até o 13 de xullo "sempre e cando o permitan as condicións climatolóxicas", matizou o presidente da Xunta, tamén abarcan as limpezas da biomasa das franxas secundarias --50 metros aos arredores dos núcleos de poboación--, así como labores de mantemento en 3.200 puntos de auga e a construción de 121 novos.

No tocante a melloras tecnolóxicas, Feijóo explicou que o Pladiga de 2020 inclúe a "potenciación" do uso de aplicacións informáticas na loita contra as chamas con medidas como a visualización actualizada de imaxes vía satélite, ademais da entrega de 'tablets' ao persoal con información "en tempo real" sobre o territorio.

DESINFECCIÓNS

O presidente da Xunta, durante a súa explicación sobre o Pladiga, aproveitou para valorar o "traballo voluntario" realizado polos bombeiros forestais e os axentes ambientais do servizo de extinción durante a emerxencia sanitaria.

En concreto, estes efectivos levaron a cabo sobre 6.000 desinfeccións en centros de saúde, residencias de maiores e de discapacitados e outras instalacións en até 200 municipios de menos de 5.000 habitantes.