Unha colisión múltiple sáldase con catro feridos na A-55, en Mos
Entre as vítimas había unha muller embarazada, que foi evacuada ao Hospital Álvaro Cunqueiro
PONTEVEDRA. EP. Unha colisión múltiple entre catro vehículos saldouse co mesmo número de persoas feridas este venres na A-55, ao seu paso por Mos (Pontevedra).
Os feitos tiveron lugar no punto quilométrico 10,200 da autovía, en dirección Vigo, pouco antes das 7,30 horas. Nese momento, Protección Civil puxo o sinistro en coñecemento do 112 Galicia, que pasou o aviso a Urxencias Sanitarias de Galicia-061, á Garda Civil de Tráfico, aos Bombeiros do Porriño, á Policía Local e ao servizo de mantemento da vía. Deste xeito, procedeuse a trasladar ás persoas que resultaron feridas, catro en total, a distintos centros hospitalarios da cidade olívica. Entre os feridos había unha muller embarazada, que foi evacuada ao Hospital Álvaro Cunqueiro, mentres os tres implicados restantes foron trasladados ao Hospital Vithas Vigo.