O aceite do Oliveiral da Concordia de Setecoros empezará a comercializarse en 2020
O párroco Paulino Sánchez e un grupo de veciños deron comezo esta mañá á colleita das olivas // Por primeiro ano están empregando medios mecánicos e esperan acadar os 400 quilos de froitos
Esperamos acadar os 400 quilos de olivas. Esa é a estimación prudente que realiza Paulino Sánchez, cura de Setecoros, no comezo dunha nova colleita no Oliveiral da Concordia. O párroco, axudado por un grupo de veciños, iniciou esta mañá os traballos de recolección na plantación da finca Igrexario, que cumpre 4 anos e medio. O alcalde, José María Bello Maneiro, e a concelleira Carmen Gómez seguiron as tarefas a pé de oliveira.
Pode dicirse que esta será a primeira colleita real, explica don Paulino xa que as dúas anteriores foron bastante limitadas. A de 2017 foi moi prematura e sumou 180 quilos de olivas que se transformaron en 25 litros de aceite. O ano pasado foi desastroso debido á climatoloxía, que impediu a floración das árbores, explica o párroco. Nesta ocasión os resultados serán moitos mellores. Bastaba só con ollar, a primeira hora desta mañá, para algunhas das oliveiras, cargadas de froitos, especialmente as da variedade arbequina, a que mellores resultados está dando ata o de agora.
Por vez primeira este ano estanse a empregar medios mecánicos para realizar a recolleita, en concreto un vareador eléctrico que sacude as ramas das oliveiras e fai caer os froitos sobre unhas redes previamente extendidas no chan.
Mañá rematarán os traballos e a partir do mércores iniciarase a fase de procesamento e produción do aceite que, logo duns necesarios meses de repouso, poderá comercializarse a partir de febreiro de 2020, estima Paulino Sánchez. Trátase dun aceite selecto, certificado por un laboratorio de Xaén como de alta calidade, engade o párroco.
O Oliveiral da Concordia
O chamado Oliveiral da Concordia xurdeu hai catro anos e medio por iniciativa do cura de Setecoros. Á miña chegada á parroquia, en 2013, esta finca estaba abandonada e iso era algo inaceptable. Durante dous anos estivemos sopesando con un grupo de veciños que cultivo se podería adaptar mellor á zona para contribuír á autofinanciación da parroquia. En abril de 2015 realizouse a plantación dunhas 900 oliveiras de tres variedades diferentes: a portuguesa ou cobrançoca, a italiana tamén coñecida como frantoio, e a española ou arbequina.
As tres variedades estanse adaptando ben, explica don Paulino. Coa arbequina é coa que estamos acadando unha maior produción, as outras dúas van máis lentas pero dando tamén indicios de que van a ser produtivas. En abril deste ano, a través dun acordo co CSIC, incorporáronse á plantación outros 30 exemplares de seis variedades autóctonas de Galicia, ás máis coñecidas a mansa e a brava.