A AELG nomea Escritor Galego Universal o vasco Bernardo Atxaga
Valorou o compromiso ético coas causas da dignidade do pobo, en concreto o euskera
Santiago. O consello directivo da Asociación de Escritoras e Escritores en Lingua Galega (AELG) resolveu nomear Escritor Galego Universal o autor vasco Bernardo Atxaga.
Este recoñecemento susténtase "en sólidos argumentos", informa a AELG nun comunicado.
Desta forma, de Atxaga destaca a ALEG "o seu compromiso ético coas causas da dignidade e en concreto do pobo vasco, e por ser creador dunha extensa e intensa obra en que o éuscaro é ferramenta de expresión da cultura de Euskal Herría e ocupa un lugar de centralidade".
Con este nomeamento, Bernardo Atxaga súmase á lista de Escritores Galegos Universais conformada por Mahmoud Darwish, Pepetela, Nancy Morejón, Elena Poniatowska, Juan Gelman, Antonio Gamoneda, José Luis Sampedro e Lidia Jorge.
Licenciado en Ciencias Económicas e en Filosofía e Letras, Bernardo Atxaga é membro de pleno dereito da Real Academia da Lingua Vasca desde 2006, e en novembro de 2010 tamén foi nomeado membro da Academia das Ciencias, das Artes e das Letras.
A súa obra abarca conto, novela, poesía e ensaio, e foi escrita e publicada integramente en éuscaro e traducida a outras moitas linguas.