Artistas de Ambar defenden a igualdade dende a danza
Oito usuarias do colectivo de persoas con discapacidade estrean hoxe na Pobra o espectáculo 'Elas' // A cita será no Teatro Elma
O Teatro Elma da Pobra do Caramiñal acollerá hoxe, a partir da unha da tarde, a presentación de Elas, unha escenificación na que, a través da danza, as artistas da asociación de persoas con diversidade funcional do Barbanza, Ambar, amosarán a súa visión sobre xénero e diversidade cunha mensaxe empoderadora focalizada na loita contra a violencia machista.
Este acto buscar visibilizar a través da expresión artística a problemática que afecta día a día a todas as mulleres, e darlle voz ás súas protagonistas.
O grupo de artes escénicas de dita entidade, que coordina Zeltia Iglesias, está formado por Iria Gómez, Montse Pouso, Montse Queiruga, Marina Mondelo, Olaya Pérez, Ángeles Devesa e Conchita Mouriña.
A maioría delas xa son veteranas na arte da performance. Unha das últimas pezas que representaron, titulada Com-unidade, trata sobre romper as fronteiras que nos separan para crear comunidade.
Unha vez rematada a posta en escea de hoxe no escenario do complexo cultural pobrense, abrirase un coloquio coas protagonistas, que estarán acompañadas de Clara Ferrao, coreógrafa e bailarina, activa no proxecto Corpo a terra e que dirixiu a peza. Contarán ós asistentes as súas vivencias e o proceso desempeñado para realizar unha obra desta calibre.
Posteriormente, terá lugar unha charla-coloquio, na que participará tamén unha representante da asociación feminista Mulleres en Acción, que fará un percorrido pola situación actual das desigualdades e violencias cara as mulleres, ademais de ensinarán ferramentas e medidas para poder abordalas.
Esta acción está promovida pola Axencia de Desenvolvemento Rural da Xunta de Galicia a través do Asociación de Desenvolvemento Local Deloa.
No acto estarán presentes representantes políticos dos diferentes concellos das comarcas de Barbanza, Sar e Muros-Noia, así como Paca Gago (xerente de Deloa) e Milagros Rey (presidenta de Ambar).
INCLUSIÓN SOCIAL. Dito colectivo barbanzán (que actualmente está presidido por Milagros Rey) avanza así no seu compromiso coa comunidade de xerar proxectos que visibilizen, reivindiquen e avoguen polos dereitos de todas as persoas, loitando contra as desigualdades e favorecendo un diálogo a prol da inclusión social.
ESCULTURA
'Baixo o mesmo teito'.En xuño, os usuarios de Ambar que participaron no obradoiro de artes plásticas (Ángel Sampedro, José Manuel Calo, Mª Eugenia Reiriz, Vanessa Rial, Montse Queiruga, Daniel Piñeiro, Yolanda Zurdo e Victoria Piñeiro) inauguraron na Praza Heroínas de Sálvora de Ribeira a instalación escultórica inclusiva Baixo o mesmo teito, que pudo verse todo ese mes.