Santiago
+15° C
Actualizado
lunes, 28 septiembre 2020
20:37
h

O Auditorio Municipal acolle o luns a charla-coloquio “Violencia de xénero, unha realidade oculta”

Catro profesionais da asociación Mulleres en Igualdade de Vigo ofrecerán unha visión multidisciplinar da violencia física, psicolóxica, sexual e económica contra as mulleres // Incidirán na necesidade de que a sociedade se implique na súa prevención e axude a detectar posibles casos

    O Auditorio Municipal acolle o vindeiro luns, 30 de setembro, ás 19 horas a charla-coloquio “Violencia de xénero, unha realidade oculta”, organizada pola Concellería de Igualdade en colaboración coa asociación Mulleres en Igualdade de Vigo e financiada pola Secretaría Xeral de Igualdade da Xunta de Galicia, no marco dunha campaña de prevención da violencia machista que pretende chegar, específicamente, a zonas do rural.

    Catro integrantes do equipo técnico do colectivo Mulleres en Igualdade –unha psicóloga, un socióloga, unha politóloga e un avogado– desprazaranse a Valga para ofrecer unha visión multidisciplinar desta problemática social. Falarase da violencia física, pero tamén doutros tipos de violencia que se exercen contra as mulleres, como a psicolóxica, a económica ou a sexual, tratando de concienciar á poboación de que todos podemos e debemos axudar na súa prevención.

    Os profesionais que participarán no coloquio farán fincapé en que “non existe a víctima tipo. Calquera muller pode verse atrapada nunha relación tóxica da que non consegue saír e acabar sufrindo violencia de xénero. Por iso é importante que a familia, os amigos e os veciños saiban recoñecer os síntomas da violencia machista para poder actuar antes de que se produza unha traxedia”.

    O Concello fai un chamamento á veciñanza para que asista á charla-coloquio e lembra que os Servizos Sociais municipais e o Centro de Información á Muller –que ofrece asesoramento psicolóxico e xurídico gratuíto– están a disposición de todos os veciños ante calquera sospeita de que poida estar producíndose un caso de violencia de xénero.

    29 sep 2019 / 10:25
    Noticia marcada para leer más tarde en Tu Correo Gallego
    Tema marcado como favorito