"Feijóo está matando máis xente que nengún grupo terrorista do estado español"
Beiras ratifícase en que "os recortes en sanidade matan" e cita ao Nobel Esquivel, que falou de xenocidio // Feijóo pide respecto
Unha frase de Beiras recollida no twitter está provocando unha forte polémica na Rede. "Feijóo está matando máis xente que nengún grupo terrorista do estado español", é a afirmación do líder de Alternativa Galega. Os tweets saltan dun ladoa outro e a controversia vaise estendendo a gran velocidade, e mentres, Beiras Beiras ratifícase en que "os recortes en sanidade matan" e cita ao Nobel Pérez Esquivel que falou de "xenocidio".
O voceiro nacional de Alternativa Galega de Esquerda e cabeza de lista por A Coruña, Xosé Manuel Beiras, ratificouse nas súas declaracións realizadas este luns e nas que, segundo recolleu un tuit desta coalición, o dirixente nacionalista dixo que "Feijóo está a matar máis xente que ningún grupo terrorista do Estado español", a reafirmarse en que non ten "dúbidas" de que "os recortes en sanidade están a matar xente" e citar ao Nobel Pérez Esquivel, que falou de "xenocidio".
Despois de que o presidente da Xunta e candidato á reelección, Alberto Núñez Feijóo, pedise "respecto" e a través da súa conta de Twitter cualificase de "lamentable" as palabras de Beiras; o dirixente nacionalista respondeu, nun comunicado: "Non teño a menor dúbida de que os recortes en sanidade están a matar xente".
"Cando unha muller con cancro de mama ten que esperar un ano en lista de espera polo tratamento, iso ¿que é?; cando un inmigrante sen traballo non pode ter asistencia médica pública, ¿que ten que facer, ir á privada sen diñeiro?; ou cando a crise económica está a levar á miseria a moitas familias, incrementa as depresións e a taxa de suicidios, ¿quen é o responsable?", puxo enriba da mesa Xosé Manuel Beiras.
Ademais, Beiras asegurou que esta afirmación "non é algo que diga só Beiras", senón que o Premio Nobel Pérez Esquivel, nada menos que un premio Nobel, dixo que a débeda e as políticas do FMI constitúen un auténtico xenocidio nos países nos que se aplican".
Pola súa banda, a número dous por A Coruña de coalición, Yolanda Díaz, afirmou que "o único" que dixo, "máis alá das formas", o "profesor Beiras", é que os "recortes en sanidade "matan". Mentres, o deputado de IU, Gaspar Llamazares, afirmou que esas políticas "custan vidas".
"Máis alá da forma, o único que fixo é poñer os focos de atención sobre o que está a pasar", asegurou Díaz, restando así importancia ás palabras de Xose Manuel Beiras, quen, "o único que dixo --concluíu-- é que os recortes "están a empobrecer" a sociedade. "E o que é máis grave, matan", subliñou nunha charla sobre sanidade na que participou este martes en A Coruña.
"OS RECORTES CUSTAN VIDAS"
Pola súa parte, Gaspar Llamazares, tamén fixo referencia ás declaracións afirmando que "os recortes en saúde custan vidas", ao tempo que puxo de relevo que se está a producir "unha deterioración na saúde" debido á "precariedade" e á "inseguridade" na que vive a poboación.
Tamén en declaracións aos medios, preguntada por iso aproveitando a súa presenza na concentración de Nunca Máis ante Palexco, Yolanda Díaz incidiu en que "o profesor Beiras foi capaz de resituar o conflito de emerxencia social terrible" e "poñer o foco nos problemas", ao respecto do que recordou que o 22 por cento da poboación vive en situación de pobreza.
"Máis alá das formas, o que fixo foi dicir alto e claro que os recortes matan, que os recortes na sanidade pública matan, que os recortes no ensino público conducen a unha brecha social inaguantable,", sentenciou.