Iberia Express conectará Vigo con Madrid a primeira hora da mañá todos os días

O aeroporto vigués de Peinador recuperará, a partir do 28 de outubro, a conexión diaria de primeira hora da mañá con Madrid, xa que Iberia Express cobre o oco que deixou Air Europa, cando atrasou o voo das 7.00 horas ata as 8.50 horas.

Así, a filial de Iberia conectará Vigo e Madrid de luns a sábado ás 6.50 horas, e os domingos ás 8.00 horas, e convértese na primeira operadora no aeroporto de Peinador. Os billetes para a nova conexión coa capital xa están á venda en www.iberiaexpress.com.

Por outra banda, a compañía confirmou que estuda implantar novas conexións dende a terminal viguesa, tras constatar o bo funcionamento da ruta Vigo-Palma de Mallorca durante o verán.

O alcalde de Vigo, Abel Caballero, que mantivo negociacións con esta compañía, celebrou que se poña fin á "lagoa importante" que supón non contar cun voo a Madrid de primeira hora, tendo en conta a importancia de este horario nunha "cidade de negocios".

Así mesmo, Caballero explicou que a compañía aérea "segue estudando" a posibilidade de poñer en marcha un voo a Tenerife.

Finalmente, o alcalde explicou que o Concello de Vigo "cooperará" coa compañía nunha campaña informativa sobre o novo voo nos medios de comunicación.