Lobos sucios, de Simón Casal, estréase este venres
Ourense. O director galego Simón Casal presentou onte a película Lobos sucios, na que conta a Segunda Guerra Mundial dende os ollos dos mineiros de Casaio, en Carballeda de Valdeorras, onde o exército nazi explotaba unha mina de wolframio, un mineral imprescindible para as súas fábricas de armamento. O filme, que está protagonizado polas actrices Marián Álvarez e Manuela Vellés, chega aos cines este venres, 8 de abril.
Simón Casal afirmou que a película, inspirada en feitos reais, ten unha mensaxe principal: o sacrificio polo ben común, xa que todos os personaxes, nalgún momento ou outro, se sacrifican por unha realidade ou un problema que vai máis alá que a súa propia vida.
Interésame o proceso de como cada personaxe chega a ese sacrificio sinalou Simón Casal, que puxo en marcha esta longametraxe a partir dun documental de Felipe Rodríguez no que atopou uns personaxes que lles fascinaron.
Marián Álvarez asegurou que o que máis lle interesaba do proxecto foi que contase unha historia da II Guerra Mundial a través dos ollos dunhas analfabetas que se converten en heroínas, e subliñou a necesidade de reivindicar a figura da muller que nunha posguerra saca adiante á súa familia, que as hai a patadas porque moitas quedaban viúvas na guerra, pero que non están recoñecidas. Gústame que se conte unha historia bélica a través dos ollos de mulleres, declarou.