Lousame saca a licitación a reforma integral da piscina
As obras inclúen a impermeabilización do vaso así como a ampliación da zona de praia // Invisten un total de 163.777
O Concello de Lousame vén de sacar a licitación a reforma integral da piscina municipal por un importe de 163.777 euros e un prazo de execución de tres meses. As empresas interesadas poden presentar as súas ofertas no consistorio ata o vindeiro 24 de febreiro.
O proxecto inclúe a substitución do sumidoiro do vaso por outro novo con rexilla de plástico e a revisión e selado de inxectores do vaso da piscina. Ademais, procederase á impermeabilización do mesmo cunha membrana antiesvarante e á instalación dun novo pavimento para todo o exterior. Asemade, contémplase a ampliación da zona de praia da piscina en catro metros.
Polo que respecta a sala de máquinas, está prevista a colocación dunha nova electrobomba centrífuga, dun caudalímetro electromagnético, dunha sonda a nivel e dun novo circuíto de tuberías, válvulas e accesorios precisos. Así mesmo, renovarase a fontanería na sala de bombas, o cadro eléctrico e dous reguladores do PH e do cloro da auga piscina.
Tamén se contempla a colocación dunha rede eléctrica de distribución interior da sala de máquinas, a substitución do alumeado da zona de vestiarios e unha nova instalación de electricidade para o alumeado exterior, con novas luminarias de tecnoloxía LED.
Finalmente, está previsto actuar sobre a carpintería e as paredes, ás que se lles aplicarán tratamentos protectores e antihumidades, así como pintura.