Santiago
+15° C
Actualizado
lunes, 13 julio 2020
21:52
h

Nace a Asociación Federalista de Galicia como espazo de análise

Estará presidida polo catedrático de Ciencia Política da USC, Ramón Máiz

Santiago. Galicia conta coa súa propia Asociación Federalista, logo da súa constitución formal, o pasado 27 de xaneiro en Santiago. Cos obxectivos de impulsar a cultura e a conciencia federal, propiciar a reforma da Constitución neste senso e contribuír á construción dunha Europa federal democrática, xusta e solidaria, a Asociación Federalista de Galicia (AFG) ten marcado xa no calendario o seu primeiro acto oficial. Será o 4 de marzo.

A AFG está presidida polo catedrático de Ciencia Política da Universidade de Santiago (USC) Ramón Máiz Suárez, cunha xunta directiva composta por Francisco Caamaño, exministro de Xustiza e catedrático de Dereito Constitucional na Universidade da Coruña (UDC), como vicepresidente; Francisco Candela, exconcelleiro compostelán de Turismo e economista, como secretario; Cristina Ares, profesora de Ciencias Políticas da USC, como tesoureira, e Xosé Ramón Pousa, decano da facultade de Ciencias da Comunicación da USC, como vogal.

A entidade nace coa intención de organizar todo tipo de conferencias, debates, encontros e reunións que contribuían a un "mellor coñecemento do federalismo e a impulsar a reforma federal da Constitución", tal e como informan os seus responsables nun comunicado de prensa.Pretende, igualmente, "elaborar e editar documentos, publicacións e artigos" relacionados co federalismo, establecendo contactos e alianzas con outros grupos do Estado e de Europa.

No seu manifesto de creación, a AFG indica que ten a vontade de servir, desde a sociedade civil galega, de espazo aberto e plural para a análise, o debate e a divulgación do ideario federal en Galicia, en España e en Europa, polo que aproveitan para facer "un chamamento á incorporación activa de todas e todos os que, residan onde residan, desde a máis diversas perspectivas profesionais, políticas e culturais estean interesados, dun xeito ou doutro, en compartir as arelas da causa federal".

O federalismo postula, como un dos seus eixos irrenunciables, a "igualdade e a solidariedade interterritoriais, o apoio mutuo baseado na suficiencia finaceira e na corresponsabilidade fiscal das comunidades federadas, a transparencia e a proporcionalidade distributiva", indican, acubillando, tamén, "a defensa convencida do pluralismo cultural e lingúístico".

15 feb 2020 / 00:00
Noticia marcada para leer más tarde en Tu Correo Gallego
Tema marcado como favorito