Nace en Compostela o colectivo Xornalistas Galegas

O colectivo Xornalistas Galegas arrancou hoxe sábado 7 de xullo, na Facultade de Ciencias da Comunicación de Santiago de Compostela, coa sinatura dun manifesto fundacional no que se recollen os principais obxectivos para integrar a perspectiva feminista no xornalismo, e defender ás mulleres de todos os ámbitos das ciencias da comunicación.

A reunión deste sábado ten carácter fundacional e supón o terceiro encontro despois do 8M, cando as mulleres xornalistas participaron do movemento e da folga feminista cun masivo seguimento nas rúas de toda a xeografía galega. Así, houbo xa dúas reunións coa participación directa de máis de 40 mulleres e o apoio de case 200 profesionais da comunicación que por distintos motivos (como o laboral) non puideron facelo presencialmente.

MANIFESTO

O manifestó engloba as reflexións e reivindicacións deste colectivo baixo o título ‘Por un xornalismo feminista’. Ademais das sinaturas recollidas no acto celebrado en Santiago, o manifesto estará dispoñible na rede para a adhesión das mulleres pertencentes a este colectivo.

Nel faise fincapé na necesidade dun “xornalismo colectivo e solidario que aúne forzas para o ben común”.

Asemade, recóllese que, pola condición de xornalista, este colectivo ten “unha oportunidade única de reverter esta situación e incidir na creación dunha corrente de opinión masiva que esixa un xornalismo implicado co feminismo e a igualdade real”.

Tamén recorda que, como mulleres, “padecemos o machismo do mesmo xeito que todas as nosas iguais e, como xornalistas, estamos suxeitas a unhas condicións profesionais e laborais específicas que perpetuan a desigualdade de xénero dun xeito que consideramos inasumible”.

REDES SOCAIS

Dende este sábado, o colectivo comezará a funcionar en redes sociais como @asxornalistas (Twitter), para visibilizar os seus obxectivos, entre os que se atopa “realizar unha vixiancia feminista dos contidos dos medios e denuncia pública e directa as publicacións machistas ou sexistas”.

TRABALLAR EN REDE E ACTO SETEMBRO

Por outro lado, co obxectivo de traballar en rede, tamén se estableceron contactos con outros colectivos feministas (plataformas, asociacións…) de outras comunidades autónomas e tres integrantes galegas participaron activamente na reunión de ‘Las periodistas paramos’ do día 2 de xuño en Madrid.

Á volta do verán, as Xornalistas Galegas farán a súa presentación nun acto público no que se presentarán acción e iniciativas, e no que se quere contar con referentes do mundo feminista.

Depende de nós, pero de todas nós! O xornalismo será feminista ou non será!

MANIFESTO COMPLETO

POR UN XORNALISMO FEMINISTA

Mulleres profesionais de todos os ámbitos da comunicación, xornalistas, fotoxornalistas, comunicadoras, formadoras, investigadoras, técnicas audiovisuais e demais produtoras de información en calquera soporte mediático, coincidimos na necesidade de articular un colectivo profesional feminista que impulse a produción dun xornalismo con perspectiva de xénero que se reflicta tanto na información que xeramos como nas condicións en que a elaboramos, é dicir, un xornalismo con perspectiva de xénero externa e interna.

Como mulleres padecemos o machismo do mesmo xeito que todas as nosas iguais e como xornalistas estamos suxeitas a unhas condicións profesionais e laborais específicas que perpetuan a desigualdade de xénero dun xeito que consideramos inasumible. Na nosa doble condición de mulleres xornalistas enfrentámonos como noutros sectores á precariedade laboral, a fenda salarial, o teito de cristal, o chan pegañento, o ninguneo ou o paternalismo. Pero tamén á contradicción de formar parte dunha poderosa maquinaria de creación de opinión, o chamado cuarto poder, que demasiadas veces non achega ao mundo a necesaria loita pola igualdade que todas e todos debemos esixir aos medios, empresas e entidades de comunicación.

Porén, a nosa condición de xornalistas outórganos tamén unha oportunidade única de revertir esta situación e incidir na creación dunha corrente de opinión masiva que esixa aos medios de comunicación e plataformas informativas públicas e privadas un xornalismo implicado co feminismo e a igualdade real. Temos nas nosas mans o maior altofalante da sociedade actual: os medios de comunicación, axentes socializadores e formadores de opinión. De nós depende comprometelos coa causa feminista na procura da erradicación definitiva do machismo e o sexismo.

Depende só de nós, pero de todas nós. Por iso imos traballar unidas, conformando unha rede de seguridade para todas as mulleres xornalistas –entendedo sempre o termo en sentido amplo, como todas as que facemos posible os constidos informativos- de modo que ningunha volva sentirse soa nesta causa. Porque despois das mobilizacións masivas en toda Galicia e en toda España o 8M, as mulleres e nomeadamente as mulleres xornalistas, temos aprendido que as nosas voces xuntas chegan ata onde nós decidamos. Témonos empoderado nun momento histórico clave para o desenvolvemento futuro da muller e temos substituído a vella concepción do xornalismo como un oficio competitivo e individualista pola idea renovada dun xornalismo colectivo e solidario que aúne forzas para o ben común. E o noso ben común non é outro que un xornalismo honesto e comprometido que só se pode acadar se interioriza de xeito definitivo a perspectiva de xénero para acadar unha sociedade xusta e igualitaria. O xornalismo será feminista, ou non será.

Por iso as asinantes deste manifesto comprometemos o noso esforzo conxunto para crear un colectivo de xornalistas feministas galegas que permita avanzar na consecución dos seguintes obxectivos:

Visibilizar á muller nos medios de comunicación, como especialistas, opinadoras e expertas en diferentes ámbitos, equiparando a súa presenza coa masculina.

Desestigmatizar a presenza da muller na información a través da erradicación de ofensas de xénero, roles sexistas, estereotipos de xénero e difundindo iniciativas que contribúan á igualdade.

Instaurar o tratamento especializado da violencia de xénero nos contidos dos medios a través da formación deontolóxica e a instalación da perspectiva feminista nos editores de contidos.

Realizar unha “vixilancia feminista” dos contidos dos medios e denuncia pública e directa das publicacións machistas ou sexistas.

Promover iniciativas profesionais feministas que eduquen e xeren conciencia social.

Incrementar a presencia das mulleres nos postos de responsabilidade das empresas de comunicación e rachar o teito de cristal.

Controlar o cumprimento real das medidas de conciliación familiar e laboral con especial atención á particularidade dos horarios dos medios de comunicación e tarefas xornalísticas en xeral.

Avaliar e reorientar a situación laboral da muller en ámbitos concretos da produción xornalística –acabar coas temáticas femininas, atención ás xornalistas deportivas, eliminación de estigmas laborais de xénero…

Integrarnos nas iniciativas de xornalistas e comunicadoras feministas estatais vinculadas á plataforma Las periodistas paramos, xurdida a raíz das mobilizacións do 8 de Marzo de 2018.

Colaborar con outras iniciativas feministas e entidades do ámbito da comunicación implicadas na consecución dun xornalismo con perspectiva de xénero.

Santiago, 7 de xullo de 2018.