Puntillas e oracións nas redes dende Camariñas e Fisterra
Inaugurada onte a Mostra do Encaixe Virtual coa presenza, a través de vídeos, das autoridades que ían asistir ao acto oficial // Todos apelaron á unidade e aplaudiron a iniciativa // Na vila do Cristo a Semana Santa dá o salto a Facebook
A Mostra do Encaixe de Camariñas e a Semana Santa de Fisterra, dúas das citas de referencia da Costa da Morte, queren manter viva a súa esencia a través das redes sociais, de xeito que en todo o mundo se poderá escoitar estes días o son dos palillos, desfrutar de desfiles de moda e tamén participar nalgúns dos actos relixiosos máis significativos da vila do Cristo.
Onte foi inaugurada a primeira Mostra do Encaixe Virtual, que xuntou, a través de vídeos, a todas as autoridades que tiñan confirmada a súa presenza en Camariñas se fose posible a celebración no pavillón Víctor Vigo. O delegado do Goberno, Javier Losada, apelou á unidade porque todos xuntos podemos loitar mellor contra o virus e afirmou que con actividades coma esta, con imaxinación e con forza, facemos tamén sociedade e labor para seguir avanzanzo no eido económico. Tamén a subdelegada do Goberno, Pilar López, quixo recalcar que a feira encaixeira é un exemplo de forza para manter viva a historia e a economía de Camariñas e de toda Galicia.
Pola súa banda, o presidente da Deputación da Coruña, Valentín González, lembrou que xa son trinta anos reivindicando o papel da muller na Costa da Morte e un oficio que deu de comer a moitas familias. A Mostra e a súa celebración encerran a esencia do mellor de nós mesmos e a esperanza que alumea o futuro na comarca, na provincia da Coruña e en Galicia.
A directora xeral de Comercio, Sol Vázquez, quixo sumarse tamén ao acto virtual a través de Facebook, sinalando que estamos separados, pero máis unidos ca nunca, e lanzou unha mensaxe de esperanza no futuro, pois a artesanía e o noso palillo vannos seguir unindo, e volveremos estar xuntos en Camariñas e a desfrutar do encaixe. Elena Fabeiro, xerente da Fundación de Artesanía de Galicia, tamén aproveitou as novas tecnoloxías para saudar a todos os que participan, ano tras ano, neste evento e, especialmente, a todas as palilleiras e a eses nenos e nenas da escola municipal de palillo que nos fan sorrir en todas as edicións e que son o futuro do encaixe.
Ademais da participación das autoridades, a xornada inaugural, e tamén ao longo de todos os días ata o domingo, a Mostra do Encaixe Virtual xuntou a grandes e xóvenes deseñadores, delegacións internacionais, empresas, artistas, voluntarios e medios de comunicación, ademais de seccións coma o Pequencaixe e a que ía ser a gran novidade este ano: Artencaixe. Todo en formato de vídeos que se poden ver na páxina oficial da Mostra do Encaixe en Facebook.
E en Fisterra, a Xunta de Confrarías da Semana Santa tamén quere manter unidos aos fieis, aínda que sexa na distancia. Ademais de recoller en Facebook imaxes, vídeos e outro tipo de iniciativas que axudan a manter vivo o espírito duns días tan sinalados, retransmitirán hoxe, ás 19.00 horas, a oración do Xoves Santo a cargo do párroco Xosé María. Despois proxectarán un vídeo das representacións da Última Cea, o Lavatorio de Pés, a Oración do Horto e o Prendemento de Xesús. O mesmo farán cos actos que estaban programados ata o Luns de Pascua.
Adaptándose aos tempos
Manuel Lavandeira
Estar na casa non é sinónimo de estar illado, senón que, grazas ás redes sociais, seguimos plenamente conectados co resto do mundo. Cambian os escenarios e medran as distancias, pero as novas tecnoloxías están a permitir que Camariñas e Fisterra poidan vivir e celebrar (doutro xeito, iso si), dúas das súas citas con máis proxección nacional e internacional: a Mostra do Encaixe e a Semana Santa. Demostran así que, con inxenio, solidariedade e capacidade para adaptarse aos tempos que nos toca vivir, nada, ou case nada, é imposible. Certo que non é o mesmo pero, alomenos, internet permite que poidamos seguir escoitando o son dos bolillos, gozar de coloridos desfiles de moda e tamén asistir aos actos relixiosos ao tempo que comeza a conta atrás para 2021.
A protagonista
A de 2021 será das mellores da historia
A alcaldesa de Camariñas, Sandra Ínsua, foi a encargada de facer o tradicional corte da cinta co que se deu por inaugurada oficialmente a primeira Mostra do Encaixe Virtual, despois de saudar a agradecer ás delegacións extranxeiras, ás palilleiras, á veciñanza e a todas as persoas que nos apoiaron a través das redes sociais.
Quixo transmitir tamén moito ánimo, ao tempo que anunciou que a trixésima edición da Mostra do Encaixe que onte se ía inaugurar celebrarémola en 2021 e tentaremos que sexa unha das mellores da historia. Recoñece que foi unha decisión moi dura ter que cancelar a feira, pero confía en que veciñas e veciños e todos aqueles que o desexen desfruten desta Mostra virtual a través das redes sociais.
A rexedora recibiu os parabéns dos responsables das distintas administracións públicas por impulsar esta edición virtual. Ademais da mensaxe da primeira mandataria local, tamén se asomaron a Facebook varios dos concelleiros do goberno local; o portavoz do PP, Mauro Aufiero; o alcalde de Serra dEl Rei, Jorge Amador; a vicepresidenta de Peniche, Ana Rita Petinga; o rexedor de Novedrate (Italia), Serafino Grassi; o modelo internacional e imaxe promocional da Mostra, o vimiancés Damián Álvarez, e o presdiente da Asociación de Creadores de Moda de España, Modesto Lomba, entre outros.