Un traballo de investigación revela a relación da Bella Otero coa cultura física a través do lendario deportista Eugen Sandow
O artigo, realizado por Tomás Abeigón, foi presentado esta mañá no Museo da Historia // O acto contou coa asistencia do alcalde, José María Bello Maneiro, e das concelleiras Carmen Gómez e Begoña Piñeiro
O alcalde, José María Bello Maneiro, participou esta mañá no Museo da Historia na presentación dun artigo de investigación da autoría de Tomás Abeigón e centrado nunha novidosa e, ata o de agora, pouco coñecida faceta da valguesa máis universal, A Bella Otero. O acto contou, ademais, coa presenza das concelleiras Carmen Gómez e Begoña Piñeiro e do técnico responsable do Museo da Historia, Santiago Chenlo.
Abeigón, vencellado profesionalmente ao fisicoculturismo e ao deporte, desvela neste traballo o gran segredo da beleza corporal da diva da Belle Époque e estrela do Folies Bergère: os aparatos de Cultura Física que foron o seu verdadeiro Santo Grial e que lle permitiron modelar o seu corpo ata ser admirado por algúns dos homes máis influíntes do mundo e conseguir encher os máis afamados teatros.
Segundo revela Tomás Abeigón, a relación da Bella Otero co culto ao corpo iniciouse no ano 1893. Durante unha estancia en Nova Iorque a artista valguesa inscribiuse nun centro ximnástico rexentado polo famoso forzudo alemán Ludwig Durlacher coñecido como Atila, en referencia ao rei dos hunos e especializado no adestrameto feminino con pesas.
Aínda así, a clave da investigación pensada para a súa publicación en revistas especializadas en educación física está na relación que uniu á Bella Otero co lendario deportista Eugen Sandow, considerado o pai do culturismo moderno. Tal é así que o Museo da Historia Natural de Londres realizou un molde de xeso do seu corpo como representación da forma ideal masculina. O seu equivalente actual sería Arnold Schwarzenegger, explica Abeigón.
Sandow foi inventor dalgúns dos aparellos ximnásticos e máis éxito da época, como as Mancuernas de muelles Sandow. Agustina Otero valeuse dos seus métodos e aparellos para modelar a súa ferramenta de traballo, o seu corpo, xa de por si agraciado. Adquiriu estas pesas, coas que realizaba unha rutina tres días á semana, e tamén o Sandow Symmetrion, un aparello de exercicio físico revolucionario e deseñado única e exclusivamente para a muller, á que permitía acadar a simetría na forma do corpo e graza no movemento. Máis en concreto, axudaba ás usuarias a lucir unha reducida cintura e unha musculatura tonificada.
A idea de que as mulleres se dedicaran á ximnasia con pesas era algo que non concordaba coa mentalidade da época. De feito, ata ben entrado o século XX non foi unha cousa demasiado ben vista. Ben por descoñecemento ou por envidia, había persoas que dicían que isto provocaría que a muller tivera un corpo demasiado masculinizado (...). Pode dicirse, neste sentido, que a Bella Otero axudou á igualdade entre homes e mulleres no fitness, asevera Abeigón no seu traballo.
O artigo presentado esta mañá afonda tamén na relación persoal que uniu á Bella Otero con Eugen Sandow unha historia de amor non correspondida por parte do deportista e céntrase nalgúns episodios da vida profesional e persoal da afamada bailarina. Por exemplo, que o seu bautismo artístico puido ter lugar na cidade de Pontevedra aos 14 anos de idade. Unha noite deambulando polo actual casco vello estoitou palmas, griterío e repique de castañolas que a empurraron a entrar nun café. Era tal o seu magnetismo, graza e donaire que o dono do local contratouna como bailarina e decidiu bautizala artisticamente co nome da súa filla, Carolina, explica o autor do traballo. Tratábase dunha tasca hostal emprazada na actual rúa Princesa, entón chamada Picheleira, e propiedade de Eusebio Álvarez.
No tocante á vida persoal da Bella Otero, o artigo de Tomás Abeigón incide na posibilidade de que a artista fose filla dun cura e aporta datos sobre o home que a violou sendo nena, Venancio Romero, alias Conainas. En concreto, afonda nos antecedentes penais deste individuo por roubo, estafa, lesións e outros excesos.
Para realizar este traballo, o autor empregou como fontes a biografía de Eugen Sandow (Sandow, the magnificent, revistas da época como La Culture Fhysique ou La Santé par le Sports, consultou os arquivos Diocesano de Santiago, o do Reino de Galicia, o Histórico Provincial de Pontevedra, o da Universidade de Santiago, o arquivo do Xulgado de 1º Instancia de Caldas e da Audiencia Provincial de Pontevedra, entre outros.