Vodas de perla
UNHA perla nace como a reacción a un corpo estraño dentro dun molusco. O resultado é un moi xeométrico e pode representar un número. Se os 25 anos de compromiso dunha parella, unha promoción de estudos ou dun traballo están asociados á prata, e os 50 ao ouro, interpolando os valores intermedios a outros metais e materiais, á perla correspondenlle os 30!
A promoción á que pertenzo como licenciada en Matemáticas está de vodas de perla. Este número mide a distancia temporal a un punto final, o de rematar a carreira, e tamén ao tempo que levamos traballando. Son moitas sensacións e aprendizaxes, e moitas persoas coñecidas, recoñecerei hoxe a algunhas para honrar a todas.
Grazas a unha bolsa de colaboración en 1989 coñecín ao profesor Alfredo Bermúdez. Este mes, a Real Academia Galega de Ciencias (RAGC) outorgoulle a Medalla Enrique Vidal Abascal. A candidatura foi presentada polo Departamento de Matemática Aplicada da USC, do que me honro formar parte desde fai 30 anos. Parabéns á RAGC pola iniciativa das medallas de investigación e, nomeadamente, por recoñecer a estos dous matemáticos. O profesor Bermúdez foi o único conferenciante invitado español no congreso internacional ICIAM 2019. Cónstame o orgullo dos profesionais da matemática industrial presentes ao escoitalo, presentando con rigor os resultados de colaborar con empresas facendo matemáticas. A conferencia está dispoñible na web do congreso (https://iciam2019.org/) se vostedes queren saborear o seu maxisterio.
Son unha das persoas afortunadas ás que Alfredo dirixiu a tese. Como filla científica non son imparcial, por iso apelo a visión global de Amable Liñan, un referente nacional e internacional en ciencia e enxeñaría, que o define como "el gran matemático aplicado español". Alfredo e Amable son valiosas perlas do meu colar, por todo o aprendido con eles no marco de diferentes proxectos, e sobre todo pola admiración que sinto pola súa humildade e o seu xeneroso compromiso coa educación pública.
A perla da profesión foi medrando como unha gran mandala, e transforma relacións de profesores ou estudantes doutros tempos en colegas hoxe. Na edición de perla dos Premios Gallegos del Año, Manuel Iglesias recordábame que lle dera clase fai 30 anos en Lugo, e hoxe podo ver grazas a unhas lentes moi ben axustadas polos exalumnos, e hoxe amigos, Ana e Carlos Vázquez Babarro de Ourense.
A etapa relacionada coa xestión é a que menos imaxinaba na carreira. Falar con Carmen Pumar é lembrar proxectos estimulantes, a Ponte, a Liga de debate... e en setembro compartir o pasamento de Fina, a primeira conserxe da Casa Jimena e Elisa, quen tanta vida puxo nestas perlas do colar!
Celebrar estas vodas de perla é dar as Grazas por este traballo, renovar o compromiso de seguir facendo matemáticas e de compartir o que facemos abrindo camiños, como os que fixeron mestres como Alfredo, e polos que gozamos camiñando en boa compañía, como nesta etapa decanal o son Rosana e Beatriz, dúas valiosas perlas!
Profesora de Matemática Aplicada na USC