O escritor galego Manuel Rivas levou onte á Torre de Hércules da Coruña a presentación da súa última novela Os libros arden mal, por ser esta construción e toda a cidade herculina a paisaxe na que transcorre o libro. A obra enlaza ficción narrativa, "thriller", drama, ensaio histórico e crónica xornalística.

Editado por Xerais, Os libros arden mal introdúcese na vida e na morte a través dunha moza lavandeira e dun posterior lume destrutor. Unha historia que se desenvolve en 1881, dende a morte de George Borrow e un vello anarquista galego chamado Polca.

A linguaxe é a protagonista da novela, pois as palabras forman parte do corpo, dos ollos ou dos dedos dos seus personaxes. A loita entre as palabras feitas para dominar e as palabras esquecidas, entre a linguaxe do poder autoritario e o que sobrevive na penumbra. Así, a novela de Rivas mestura a linguaxe bélica e o falar popular, o dogmático co erótico do entroido.

A obra pretende introducirse a un camiño interior, de intersticios e de inexplicables episodios históricos. A estrutura, en forma de esfera armilar, esta composta por diferentes órbitas nas que os astros, ademais de vidas humanas son os propios libros, os animais, as plantas e as palabras. Unha esfera que aúna multitude de voces, unha escritura encarnizada, sempre en vilo.

O escritor, que o pasado venres asinou exemplares desta súa agardada novela na Feira do Libro de Vigo, escolleu a Torre de Hércules -e o seu barrio natal, Montealto-, que, xunto coa cidade da Coruña, ocupa un lugar sobranceiro en Os libros arden mal, até incluír no seu limiar un mapa cos principais fitos paisaxísticos da urbe coruñesa.