Agenda cultural: ¿Qué hacer hoy, 27 de noviembre, en Santiago?

Ópera contemporánea no Teatro Principal

O Teatro Principal acolle hoxe ás 20.30 horas a ópera contemporánea Pálido punto azul, unha peza composta por Javier Otero Neira e con libreto de Iria Azevedo. A obra toma como punto de partida a famosa fotografía capturada pola sonda Voyager 1 en 1990 a unha distancia de 6.000 millóns de quilómetros da Terra, unha petición de Carl Sagan e a derradeira imaxe do planeta antes de apagar definitivamente as cámaras. A entrada é de balde ata completar a capacidade da sala.

Juan Tallón asina exemplares de ‘El mejor del mundo’

O escritor Juan Tallón estará hoxe a partir das 18.00 horas na librería de El Corte Inglés para asinar exemplares da súa última novela El mejor del mundo. Ás 21.00 horas o colaborador de Prensa Ibérica, grupo editorial de EL CORREO GALLEGO, recollerá no Hostal dos Reis Católicos o Premio Novela Europea Casino de Santiago por Obra maestra. Ademais, a sala de Ámbito Cultural do centro comercial acolle ás 10.30 horas a presentación de Baixo o ceo de xeo, Premio Illa Nova de Narrativa 2024 de Adrián Pérez Bote.

Carlos Meixide presenta 'Tres irmáns'

A Casa do Taberneiro (Rúa de San Pedro, 15), acolle esta tarde (19.30h) a presentación da novela Tres irmáns' de Carlos Meixide. O escritor residente en Compostela estará acompañado pola tamén escritora Berta Dávila, coa que comparte o selo editorial Rodolfo e Priscila. En Tres irmáns, Meixide sitúa a narrativa na Comuna de París, que xa tocara na súa anterior obra 'Viva a Comuna!.

Proxectan un documental sobre a explosión do porto de Beirut

A Fundación Araguaney-Puente de Culturas proxecta hoxe ás 20.00 horas no salón Olivo do hotel Eurostars Araguaney o documental Dancing on the edge of a volcano, dirixido polo libanés Cyril Aris. Enmarcado na mostra O Líbano en 8 mm, relata a historia da explosión non nuclear máis poderosa da historia, ocorrida no porto de Beirut o 4 de agosto do 2020. Deixou máis de 200 mortos e 6.000 feridos e transformou a cidade nun lugar moi parecido a unha zona de guerra debido á devastación.

Obradoiro de bonecos de trapo na Ánxel Casal

A biblioteca Ánxel Casal acolle un obradoiro de bonecos de trapo ás 18.30 horas para nenos de 6 a 12 anos a cargo de O Faiado de Nin. Cada participante dará vida a unha personaxe de trapo, personalizándoa ao seu gusto. As persoas interesadas poden recoller a entrada no mostrador de información dende 30 min antes do comezo da actividade.