Axenda cultural: Que facer hoxe 19 de maio en Santiago?

Reunión de artistas de Cádiz e Compostela no Tambre

PINTURA. A Asociación Área Empresarial do Tambre (AAET) inaugura ás 20 horas deste serán a exposición colectiva de pintura e fotografía Afinidades ComposteloGaditanas de cinco artistas: Cecilio Chaves, Inés Gontad, Julián Gades, Nietto e Suly. A exposición está composta por máis de 20 obras, entre pinturas figurativas, ao óleo e tamén acrílicos, e fotografías. A mostra, exposta no Centro Empresarial do Tambre –Rua Via Edison, 1– reúne a obra de artistas composteláns e gaditanos.

Intervención no NH Collection

A Galería Luisa Pita inaugurou o venres no NH Collection Santiago a súa segunda intervención artística, coa exposición Humanidade, do creador galego Arturo Álvarez. A mostra, concibida especificamente para o cubo de cristal que dá acceso ao vestíbulo pode visitarse durante os próximos nove meses.

Conferencia sobre o acceso á vivenda nos Luns do Ateneo

CONFERENCIA. A partir das 19.30 horas o Ateneo de Santiago organiza unha nova charla, desta volta titulada Accesibilidade á vivenda e desigualdade social no século XXI, impartida polo investigador Ramón y Cajal da Universidade de Santiago de Compostela, Ismael Yrigoy. O relator é especialista no impacto do mercado inmobiliario na configuración das cidades e na distribución social do territorio, e ofrecerá no Ateneo unha análise crítica das dificultades crecentes para acceder a unha vivenda digna nos diversos contextos urbanos.

Charla sobre a epilepsia na Ánxel Casal

SAÚDE. A Biblioteca Pública Ánxel Casal cede o seu salón de actos a FADEMGA Plena Inclusión para a realización da charla Epilepsia: investigación e innovación compartida. Unha xornada sobre epilepsia, ciencia e o papel das persoas na investigación médica, aberta ao público xeral –que pode inscribirse antes do inicio do acto– que dará inicio ás 19 horas.

Divulgación científica con ‘Pint of Science’

Pint of Science –o maior festival internacional de divulgación científica– celebra dende hoxe até o mércores a súa X edición, un encontro «distendido entre ciencia e cidadanía» que vai ter lugar no Café Bar Alborada de Veiga –praza de Pascual Veiga, 4, local 8– a partir das 18.30 horas, con entrada libre e gratuíta para todo tipo de públicos.

Celebrando as Letras na Cidade da Cultura

Tesoureiras do noso é unha exposición para poñer o foco en todas as mulleres que mantiveron viva a poesía e a música de tradición oral e para coñecer tamén como foi evolucionando a súa recollida e posta en valor ao longo dos tempos. Unha mostra na Biblioteca de Galicia que recompila libros, cancioneiros e material audiovisual para comprender a todas esas mulleres tocadoras.  

Mostra artística e ‘Diversa’ en Afundación

Na sede de Afundación, na rúa do Vilar (19) pode visitarse de 12 a 14 e de 16.30 a 20.30 horas a mostra DIVERSA, unha selección das propostas máis representativas da ilustración actual que explora como as experiencias persoais dos artistas converxen para dar forma a un discurso visual que dialoga cos retos e temas do noso tempo.