‘Lume’, serie sobre incendios en Galicia e Portugal protagonizada por Cristina Castaño, chega esta noite á TVG

Tras a súa presentación no Festival Internacional de Series Ría de Vigo, no que foi premiada como Mellor Serie do Público, Lume, un thriller xornalístico con fondo social e ecolóxico, chega este luns á pequena pantalla. Faino esta noite, ás 21.45 horas, como unha das grandes apostas da Televisión de Galicia (TVG).

A serie –unha coprodución da TVG e a canle lusa RTP que contou co apoio da Axencia Galega das Industrias Culturais (AGADIC) e a participación das productoras Setemedia e Coral Vision Europa– está protagonizada pola galega Cristina Castaño e conta coa presenza de actores como o portugués Albano Jerónimo ou os intérpretes galegos Alfonso Agra, Xúlio Abonjo e Isabel Naveira, entre outros.

Composta por seis capítulos e rodada tanto en galego coma en portugués, Lume achega a historia de Lucía (Cristina Castaño), unha xornalista asentada en Lisboa que regresa á súa localidade natal, Seara, tras un devastador incendio forestal. Sen embargo, os veciños recíbena con hostilidade porque lembran o pasado do seu pai como un incendiario.

Convencida de que o incendio non foi accidental, Lucía (Cristina Castaño) iniciará unha investigación que sacará á luz unha perigosa rede de intereses económicos e políticos. Un camiño en busca de respostas moi perigoso cheo de suspense e drama.