Santiago
+15° C
Actualizado
martes, 28 junio 2022
21:01
h

A actividade de Protección Civil, indispensable no Plan contra Incendios de Ames

O edil mailo alcalde abordaron o dispositivo, que busca reducir o tempo de resposta, cos corpos de seguridade

Preto de vinte persoas se reuniron esta mañá no Pazo da Peregrina para coñecer os protocolos que un ano máis pon en marcha o concello co obxectivo de estar preparados ante un incendio no termo municipal. O concelleiro de Transición Ecolóxica, Manuel Lens, detallou os medios cos que conta o Concello de Ames na súa loita contra o lume e agradeceu a todos e todas as asistentes o interese posto no plan.

“Espero non vervos por este tema en todo o verán” ese foi o desexo do concelleiro, e ao que se sumou o alcalde de Ames, Blas García. O rexedor municipal gabou, ademais, a implicación de Protección Civil, “cuxo papel na loita contra o lume é fundamental na actualidade” e lembrou a formación específica para intervir en incendios que recibiu o persoal de esta asociación.

voluntarios. Precisamente a Asociación de Protección Civil tomou a palabra para presentar o traballo realizado na elaboración dun mapa das hidrantes de todo o concello. Segundo Juan Pérez, responsable da agrupación, este traballo está encamiñado a reducir o tempo de resposta ante un posible incendio. O estudo inclúe un mapa coas coordenadas GPS e unha lenda onde se describe o que se van atopar no lugar e o estado en que se encontra. Protección Civil está formada por 33 voluntarios que se van a dividir en tres equipos de traballo. Xunto ao persoal humano destacan como novidades a incorporación dun equipo autónomo que permite converter puntos de auga en hidrantes, o material necesario para montar un posto de mando avanzado no lugar do incendio ou un vehículo todoterreo adaptado tanto ao transporte de materiais como á evacuación das persoas presentes alí.

coordinación. A través deste plan artéllanse e organízanse os medios persoais e materias dos que dispón o Concello de Ames no operativo municipal de prevención de incendios. Os distintos equipos de intervención englóbanse en grupos de prevención, sanitario e acción social, transmisións e coordinación da operativa e de loxística e seguridade. Este último está formado por membros da Policía Local, a Garda Civil, Policía Autonómica, a brigada de obras, a Asociación de Protección Civil e de GES-Brión; mentres que o equipo sanitario e de acción social, inclúe traballadores sociais, médicos de atención primaria e voluntarios.

Como novidade, incorpóranse a este Plan de Incendios do ano 2021 o concelleiro de Administración Xeral, Víctor Fernández e o concelleiro de Medio Rural, Santiago Márquez. O plan é unha folla de ruta que facilitará a actuación de cada un dos sectores implicados en caso de producirse un incendio no noso Concello e que ten como obxectivo unir esforzos na loita contra o lume.

PROTOCOLO. No protocolo establécense, ademais, tres tipos de situacións de emerxencia, segundo a magnitude do lume, os bens forestais e de natureza non forestal aos que afecten e as necesidades e medios que se precisen para atallalo.

As situacións segundo o nivel en que se atope o lume son pre-alerta, alerta e emerxencia. O plan define cada unha das fases e os pasos a seguir en cada unha delas, definindo a labor de cada grupo de emerxencia e o papel que han de desempeñar tódolos servizos en cada unha das devanditas alertas establecidas.

14 jul 2021 / 01:00
  • Ver comentarios
Noticia marcada para leer más tarde en Tu Correo Gallego
Selecciona los que más te interesen y verás todas las noticias relacionadas con ellos en Mi Correo Gallego.