Conciliación máis comedor para case 1.900 amesáns

a maía. Despois do comezo do curso escolar 2021-2022, a concellería de Educación de Ames divulga que van ser 1.879 os alumnos que fagan uso dos comedores escolares ou dos programas Bos días cole e Tardes divertidas. Os servizos complementarios de educación e conciliación ofértanse nas instalacións dos cinco centros de educación infantil e primaria públicos de Ames. O máis demandado segue a ser o de Comedores escolares cun total de 1.349 usuarios. Séguelle o Bos Días Cole con 349 usuarios e pecha a listaxe o servizo de Tardes Divertidas onde existe un total de 181 inscritos. O servizo de comedores escolares segue ano tras ano a gañar adeptos. No CEIP Agro do Muíño son 337 os alumnos inscritos no servizo de Comedores Escolares, no CEIP A Maía son 335, no CEIP de Barouta inscribíronse 105 alumnos, no CEP de Ventín 356 e na EEI do Milladoiro 198, na EEI de Covas son 10 nenos e na EEI A Igrexa con 8 os usuarios dos comedores escolares. Estes programas teñen como principal obxectivo conciliar a vida familiar e laboral de todos os veciños da capital da Maía ofrecendo un servizo que vai dende as oito da mañá ata as nove da noite. O edil amesán de Educación, David Santomil, suliña entre as novidades deste ano o flamante “comedor do CEIP A Maía e novos servizos de conciliación nas escolas unitarias de Covas e Ortoño”. m. outeiro