Dodro presume de arquitectura local vencellada á auga
As fontes, lavadoiros e muíños puxéronse en valor a través da difusión de fragmentos do libro sobre toponimia de Lorenzo Baleirón
A auga centrou a actividade no Concello de Dodro con motivo da celebración, o pasado día 22, do Día Mundial de este líquido esencial para a vida. Así, os responsables municipais organizaron unha actividade de divulgación da arquitectura local da auga nas redes sociais, na que puxo en valor as fontes, lavadoiros e muíños de Dodro, a través das publicacións de fragmentos do libro Toponimia de Dodro e de Laíño. Os nomes na auga, de Manuel Lorenzo Baleirón, e a través das publicacións de enlaces ao catalogo de elementos patrimoniais obaixoulla.gal, onde se recollen elementos patrimoniais.
Outra das actividades foi a realización dunha mesa de traballo nomeada Os retos da auga en Dodro, que tivo lugar o pasado día 23 de marzo e na que se contou coa participación dun técnico da entidade pública Augas de Galicia, dun técnico da empresa concesionaria Viaqua, do concelleiro de Cultura e Patrimonio e do alcalde de Dodro.
Nela, púxose de relevancia a importancia da auga, analizouse a situación das redes de abastecemento e saneamento municipal, recoñecendo o gran esforzo inversor que están a realizar para a mellora destas redes, así como a importancia da separación das augas pluviais da rede de saneamento. Tamén se discutiu sobre o bo estado do río Regos e regatos de Dodro.
··· Tamén se traballou na fixación de retos cara o futuro, como a optimización da rede de abastecemento ata chegar a reducir a auga non rexistrada a un 20 %, o que suporía cumprir cas máis altas esixencias; impulsar a dixitalización dos procesos ca mellora das instalacións dos depósitos de auga, así como reducir a contaminación das augas receptoras de verteduras e conseguir a reutilización dos lodos xerados da EDAR. Tratouse tamén da mellora na xestión das traídas e mananciais veciñais, pero fixo ver que os sobrantes de auga das particulares deben ter un tratamento especial. Viaqua propuxo facer actividades cos escolares.