Medio ambiente e cultura, ao consello dos nenos o 16

A Maía. Vinte e nove rapaces dos centros escolares de Ventín, Agro do Muíño, Barouta e A Maía reuníronse por primeira vez no foro de participación infantil de Ames, xuntanza previa á celebración do Consello Sectorial de Nenas e Nenos, na que se propuxeron ideas e actividades para debater no seu próximo pleno, o vindeiro mércores 16. E foi na casa da cultura de Bertamiráns onde se fixo a xuntanza, co acompañamento da concelleira de Benestar Social, Luisa Feijóo; o coordinador de Voluntariado e secretario do consello sectorial, Rubén Ramos, e a educadora familiar Soraya Añón. Entre os temas que abordaron, estaba a limpeza dos ríos, excursións, planta de árbores ou mesmo o catálogo das bibliotecas. “Sorprendeunos gratamente a calidade e a madurez das súas propostas, así como o seu espírito participativo e democrático”, sinalou Feijóo. Este consello nacía o pasado 23 de novembro, ca asistencia de medio cento de rapaces. O.D. Vilar