Trazo defende a igualdade de xénero con vídeos de historias femininas e a través de espectáculos

Este luns celébrase o Día da Muller, e o Concello de Trazo quixo facer que as mulleres estean máis presentes que nunca a través das súas historias, que se mostran nunha serie de vídeos de relatos en primeira persoa. Ademais, quixo unirse á conmemoración desta cita organizando tres espectáculos que teñen como trasfondo a loita contra a violencia de xénero. O primeiro terá lugar o día 17, ás 11.30 horas no centro social polivalente. Teatro dos Ghazafelhos presentará Iriña bailarina; unha obra dirixida a un público familiar que convida a reflexionar sobre a igualdade, o cambio de roles ou acerca dos estereotipos sociais.

A seguinte proposta está prevista para o mércores 17 ás 10.15 horas no Punto de Atención á Infancia. Paco Nogueiras presenta Brinca vai! De aquí a acolá. Está baseado no libro-cd-dvd Brinca Vai!, editado por Kalandraka Editora, no que se combinan cancións, animacións e interpretacións cos ritmos e rexistros máis divertidos. É toda unha viaxe cargada de humor, baile e cancións.

A derradeira actividade para conmemorar o 8 M está programada para o sábado 27 tamén no centro social polivalente. Trátase do espectáculo Feo, de Caramuxo Teatro. Esta obra está inspirada no Patito feo de Hans Christian Andersen. A pequena fábrica de patiños de goma de Il Papero Guiallo produce todos os días centos e centos de patiños domesmo tamaño e cor, pero un día sae un patiño de goma diferente.

En todos os espectáculos as prazas serán limitadas por motivos de seguridade polo que é preciso anotarse previamente no teléfono 981 689001. Só poderá acudir un adulto acompañando a cada neno ou ben un por familia.