Arden un coche e unha moto nun garaxe dun edificio na Ponte do Porto
O incendio produciuse de madrugada nun inmoble da rúa Río do Cura // Interviron os bombeiros de Cee para extinguir o lume // Non se produxeron danos persoais
Un incendio orixinado no interior dun garaxe dun edificio da rúa Río do Cura, de Ponte do Porto (Camariñas) calcinou un coche e unha moto e afectou á súa estrutura, segundo informa o 112 Galicia.
Un particular alertou a dito servizo ás catro da madrugada ao ver que saía fume do garaxe. O Centro Integrado de Atención ás Emerxencias de Galicia deu aviso aos Bombeiros de Cee e aos axentes da Garda Civil. Por se fose preciso apoio no lugar, tamén se informou ao parque de Bombeiros de Santa Comba.
Logo de varias horas de traballo, o lume foi apagado e dos cinco vehículos que había no interior arderon dous, unha moto e un coche. Os bombeiros tamén indicaron que o fume afectou á estrutura do garaxe pero que, por fortuna, non houbo que lamentar danos persoais.