Máis de medio século de ensinanza musical na escola municipal de Cee
Neste curso contará con dez profesores titulados que imparten trece especialidades
Cee. Arranca un novo curso na Escola de Música Municipal de Cee, e xa van 26. Lonxe queda o ano 1996 cando botaba a andar para “atender aos alumnos que se interesaron por aprender a ler partituras e tocar algún dos instrumentos que entón se ensinaban”, afirma o director, Fernando Fraga. Dende entón foron moitos os que puideron aprender e desfrutar tocando un instrumento.
No presente curso, a escola ceense conta con 10 profesores titulados superiores da materia, que ensinan e imparten 13 especialidades instrumentais, materias teórico-prácticas desde os 5 anos. Ademais, conta cunha banda de música dende 1998, que acolle a todos os alumnos que se forman no centro e ten actividade musical todo o ano: pasarrúas, procesións, concertos, gravacións....
Unha experiencia musical que, segundo Fernando Fraga, “lles permite tocar por toda Galicia”. Tamén animan aos seus alumnos a que “amplíen e proxecten a súa formación musical, superando as probas de acceso dos conservatorios profesionais e superiores da contorna e presentándose a concursos”. Dous dos músicos formados en Cee gañaron outros tantos certames de acordeón en Ponferrada e asisten a cursos de perfeccionamento. J. M. R.