Muxía adicará máis de setenta mil euros a axudar ás empresas locais
Muxía. O Concello muxián adicará 74.579,73 euros ás axudas de autónomos e microempresas do municipio, ao amparo do programa PEL Reactiva da Deputación da Coruña para municipios de menos de 50.000 habitantes.
A administración local aportará un total de 14.915,95 euros, e o restante (59.663,78 €), serán aportados pola entidade provincial. Dende o goberno local aseguran que xa están a traballar nunha modificación orzamentaria para darlle traza a esta liña de axudas ao tecido empresarial.
O obxectivo, segundo o alcalde, Iago Toba, é paliar a crise xerada pola Covid-19 no sector das microempresas e autónomos, “un dos máis castigados pola pandemia”.
Lembra que o pasado mes de agosto a Deputación puxo en marcha esta iniciativa que suporá “duplicar o investimento que a entidade provincial realiza en materia de emprego para o ano 2020, e púxemonos mans á obra”.
Asegura Toba que “temos que estar ao carón da veciñanza e como responsables públicos así o faremos”. Iniciativas similares están en marcha tamén noutros concellos da contorna. J. M. R.