Obradoiro artístico de formigas no Museo Man de Camelle
Paralelamente desenvolverase a exposición ‘Ants, Treballadores’ de creadores das Baleares
O Museo Man de Camelle organizará o 25 de abril un obradoiro artístico titulado ‘Formigas’, que se levará a cabo paralelamente á visita da exposición Ants, Treballadores, unha mostra prevista para finais do mes que foi realizada por artistas baleares en homenaxe ás mulleres anónimas traballadoras e que está a percorrer o territorio nacional.
No taller cada persoa participante con inquietudes artísticas poderá intervir e transformar durante catro horas a súa propia formiga de ferro, que despois será presentada xunto á exposición. A organización proporcionaralles unha figura de 18 ou 25 centímentros e tamén se lles dará pintura. Se desexan empregar outros materiais ou programan outro tipo de transformación deben traelos xunto coas ferramentas necesarias.
Para asistir é necesario reservar praza antes do 19 de abril enviando un correo electrónico a museodoman@camarinas.net ou chamando ao teléfono 981 710 224. Os matriculados deberán pagar unha taxa de 10 euros.