Socialistas e populares fan valoracións opostas dos orzamentos

Carballo. O PSOE súmase ás críticas do BNG e denuncia que “o goberno de Feijóo abandona, un ano máis, á Costa da Morte cuns orzamentos que non apostan polo impulso das súas potencialidades”, afirma o deputado Marín Seco.

Advirte de que “as necesidades imperiosas en infraestruturas, servizos sociais, sanidade e educación” destas comarcas “non veñen contempladas no orzamento de 2021” e critica “uns investimentos menores para tratar de ocultar o abandono sistemático do PP aos cidadáns deste territorio”.

Seco afirma que “a este ritmo” a vía de alta capacidade da Costa da Morte “será unha realidade o século que vén”, e lamenta “a falla de actuación contra a inxusta peaxe da AG-55”, ao tempo que critica que a Xunta “esquece ao Hospital Virxe da Xunqueira”.

Pola contra, dende o PP resaltan o compromiso da Xunta. O concelleiro carballés e deputado autonómico Rubén Lorenzo tacha de “bochornoso o intento que o BNG está a realizar para confundir”.

Agradece os “máis de 2 millóns de euros” que se investirán en Carballo, resaltando os máis de 500.000 € que destinará a Consellería de Cultura, Educación e Universidade para a adquisición de equipamentos para educación infantil e primaria, o financiamento do banco de libros, do transporte escolar ou o comedor, “sen esquecer a partida extra para gastos provocados pola pandemia”. Asemade, engade, investiranse 400.000 euros na mellora da residencia da terceira idade. M. L.