Vimianzo alerta dunha posible estafa vinculada ao bono social da luz

O Concello de Vimianzo advirte dunha posible estafa en Treos tras rexistrar varios casos de dous individuos que se fan pasar por comerciais dunha subministradora eléctrica e piden, porta a porta, datos persoais e medicións dos contadores coa excusa de tramitar o bono social da luz.

A alcaldesa, Mónica Rodríguez, púxose en contacto coa empresa subministradora nesta zona para corroborar esta posible ilegalidade, e os feitos xa están en coñecemento das autoridades. O obxectivo destas persoas é captar novos clientes sen saber que se cambian de compañía para asinar contratos cunhas condicións abusivas.

Desde o Concello rógase precaución e que, de ter coñecemento, as persoas afectadas se poñan en contacto ca Garda Civil para poñer freo a esta posible estafa.