Boiro executa servizos e beirarrúas na estrada de Cespón a Quinteiro

Boiro. A xunta de goberno local de Boiro deu luz verde á execución de beirarrúas e servizos da DP-1106 dende Cespón a Quinteiro. O executivo local aprobou un investimento por importe de 352.555,64 euros do Plan de Obras e Servicios da Deputación da Coruña para levar a cabo esta obra. O alcalde, José Ramón Romero, visitou este xoves o lugar no que se proxectan as actuacións.

O proxecto contempla a beira este entre os puntos quilométricos PK 4,700 e PK 6,200. Segundo indicou Romero, o obxectivo desta intervención é dotar á parroquia de redes separativas de pluviais e fecais, rede de calidade de subministro de auga e alumeado público que garanta unhas condicións axeitadas de seguridade viaria.

Vaise actuar nun tramo de 1.500 metros lineais nos que se vai executar unha rede separativa de pluviais e fecais que contará con 30 arquetas sumidoiros e unha rede de auga potable que permita dispoñer de abastecemento municipal, para o que se van colocar un total de 30 acometidas domiciliarias e 3 hidrates para o servizo de bombeiros.

A actuación rematará coa execución dunha beirarrúa de 1,5 metros de ancho ao longo de toda a marxe este da estrada, que contará con alumeado público realizado con rede soterrada eléctrica e luminarias tipo LED. m. t.