Escolares de Rianxo pintan un mural feminista nunha praza de Taragoña
O pasado día 8 de marzo, o CEIP San Benito da cidade de Madrid tiña programada unha visita didáctica ao coñecido como Mural Feminista de Ciudad Lineal. Á primeira hora desa mañá, a ANPA do centro facía pública a consternación da comunidade escolar ante a nova da agresión da que poucas horas antes fora obxecto o mural, coa ocultación dos textos e dos rostros das mulleres alí representadas. A partir dese momento, sucedéronse continuas mostras de rexeitamento ao boicot realizado, pero tamén numerosas iniciativas para multiplicar na maior cantidade posible de espazos a mensaxe deste agredido mural feminista.
A Escola de Educación Infantil Rosalía de Castro (escola do Cruceiro) do Centro Rural Agrupado (CRA) de Rianxo fixo seu ese chamamento e propúxose como obxectivo realizar, xunto coa comunidade educativa, un mural que reivindique o papel da muller na Historia e nas conquistas sociais.
Como primeiro paso, e durante a pasada semana, os alumnos e alumnas de dito centro realizaron pequenos debuxos en cartolina dedicados a oito mulleres de significativa importancia para as crianzas e para a comunidade en xeral. A partir da presente semana, obtido o visto bo do Concello para acometer a actuación, realizarase un mural na praza pública sita en Campos de Pasos (Taragoña) e a carón da escola Rosalía de Castro.
Respectando en todo momento as normas sanitarias e o protocolo de actuación ante a pandemia derivada da COVID, a creación corre a cargo do alumnado e membros da comunidade educativa, así como tamén de artistas colaboradores como Raúl Gil Burés, Natalia Horschovski, Electra Menéndez, Irene Ordóñez e Alfonso Martínez.