Novas redes de servizos na aguiñense rúa das Américas

Ribeira. Un total de 31 empresas presentaron as súas ofertas ó concurso para executar as obras de renovación dos servizos e pavimentación na rúa das Américas, na parroquia ribeirense de Aguiño.

Esta intervención pretende mellorar a contorna a través da substitución tanto das beirarrúas de baldosa hidráulica e do aglomerado asfáltico (que están en mal estado) como dos servizos de auga potable, saneamento e pluviais, actualmente deficitarios.

No tocante á canalización de pluviais colocarase un colector de PVC de 315 milímetros de diámetro que conducirá as augas ás redes situadas na rúa Francisco Lorenzo Mariño. O orzamento da intervención ascende a 182.934 €, IVE incluído. s. s.