Ruiz redistribúe as competencias tras a incorporación de Javier Sampedro
Ana Barreiro asume Servizos Sociais e a primeira tenente de alcalde Planificación
Ribeira. O goberno local de Ribeira procedeu a aprobar unha redistribución parcial de competencias logo da incorporación como concelleiro no último pleno de Javier Sampedro e mantendo un carácter continuista nas diversas áreas municipais en que está distribuido o executivo.
Así, este edil oriundo de Castiñeiras asume as delegacións de Xuventude e Deportes, que antes estaban sendo desempeñadas por Juana Brión. Esta última conserva a área de Educación e incorpora as de Administración, Innovación Tecnolóxica e Transparencia, Atención e Participación Cidadá.
Ana Barreiro Rego, que era a delegada destas últimas competencias, pasa a encargarse das que desempeñaba a concelleira dimisionaria Ana Ruiz no ánimo de proseguir o seu gran traballo: Servizos Sociais, Promoción Social, Igualdade e Diversidade.
Cabe sinalar ademais que outro cambio recente levou a que a área de Infraestruturas e Urbanismo pasara a denominarse Concellería Delegada de Urbanismo, Planificación e Desenvolvemento Orzamentario, sendo a súa titular María José Sampedro; mentres que Emilio Pérez asume agora a segunda tenencia de alcaldía. m. t.