Semana da Diversidade en Ambar cun ciclo sobre arte, educación e emprego
A entidade organizou tres conferencias que se impartirán ‘online’ os vindeiros días 3, 9 e 10
Ribeira. Con motivo do Día Internacional da Diversidade Funcional (que se celebra o vindeiro xoves tres) e do Día Internacional dos Dereitos Humanos (que será o dez), a asociación de persoas con diversidade funcional Ambar de Ribeira vai celebrar a Semana da Diversidade cun ciclo de charlas-coloquio online sobre os temas dos proxectos que desenvolve: arte, educación e emprego.
Así, o xoves 3 ás 12.00 impartirase a titulada ‘Arte e empoderamento’, a cargo de Patricia Amil Edreira (responsable da área didáctica de arte da Fundación Mª José Jove) e Adriana Pazos Otton (responsable da área de incidencia social da Federación Autismo Galicia e directora dos proxectos Auladeideas, Educación e Creatividade; Aula Diversa, Arte e Diversidade; e Olalab, Acción Cultural). O día 9 ás 17.00 haberá outra charla sobre educación inclusiva (a cargo de Alba Pérez, psicopedagoga e terapeuta de atención temperá, e María Lusia Fernández, autora do libro La mirada de Ángel), e o día 10 ás 16.00 horas, outra sobre emprego e diversidade funcional (a cargo de Daniel Tojo, orientador laboral da asociación Ambar). O prazo de inscrición está aberto na web do colectivo. s. s.