Solicitan que Pérez renda contas sobre a contaminación da ría noiesa

Noia. Desde a Plataforma para a Defensa da Ría de Muros-Noia (Plademar) amosaron o seu malestar a través dun comunicado polas palabras que pronunciou o concelleiro noiés, José Pérez, na última sesión plenaria respecto á contaminación da ría. Segundo sinalan no escrito, o edil asegurou “que é todo un invento”. Por todo, emprázano “para que nos amose e nos explique polo miúdo aos mariscadores e demais traballadores, eses estudos e traballos feitos polos técnicos aos que se referiu”, indican dende o mencionado colectivo.

Solicitan que lles argumente “como é posible que os vertidos de vinte e dous concellos que evacúan os residuos na bacía do Tambre, conforme aos datos dos organismos oficiais, non afectan á ría”, Así como “os niveis estratosféricos de metais pesados que saen das minas de San Fins, corroborado por Augas de Galicia”, puntualizan.

Ademais, pídenlle a Pérez que convoque a Mesa Municipal pola Calidade dos Recursos Naturais, “para que nos expoña publicamente a documentación que manexa sobre este asunto para que poidamos comprobar como as augas fecais de 14.000 persoas, a maioría sen depurar, non contaminan a ría”, conclúen dende Plademar. m.t.