Adxudican as melloras das redes viarias de Lendo e Montemaior
A administración local investirá 125.000 € en reforzar a seguridade e renovar pavimentos
A Laracha. A Xunta de Goberno Local da Laracha acordou adxudicar a Construcciones J. Mauri e Hijos S. L. os contratos de execución de dous proxectos de mellora da rede viaria que suman un importe total de 125.000 euros.
Fixérono despois de que a mesa de contratación clasificase recentemente as catorce ofertas –sete por proxecto– que se presentaron durante a fase de licitación.
O que afecta á parroquia de Lendo está valorado en preto de 70.000 euros. Contempla intervencións de mellora da superficie de rodadura en O Canle, Samiráns e O Cruceiro Novo. Neste último lugar tamén se colocará un pavimento diferenciado con adoquín de granito no perímetro do cruceiro para aumentar a súa protección, así como a canalización da rede de recollida de pluviais e a instalación dunha bionda de seguridade.
En Montemaior o proxecto, valorado en máis de 55.000 euros, contempla dúas intervencións diferenciadas. A de maior entidade afecta a O Raño, onde tamén será reforzada a seguridade viaria coa instalación dunha bionda debido ao desnivel existente cos terreos adxacentes. A outra actuación será na estrada que comunica A Baiuca con A Pena.
Unha vez completado o procedemento de contratación, prevese que as obras comecen a executarse nos próximos días.
Por outra banda, dende o Concello lembran que o 2 de xaneiro a Xunta abrirá o prazo para solicitar as axudas para o alugueiro de vivenda convocadas polo IGVS. M. Ramos