Apoio para urbanizar a contorna das vivendas de mestres de Cabana
BERGANTIÑOS. A consellería de Medio Ambiente, Territorio e Vivenda, Ángeles Vázquez, e o alcalde de Cabana, José Muíño, estudarán vías de colaboración para levar a cabo os traballos de humanización da contorna de seis antigas vivendas de mestres, rehabilitadas recentemente polo Concello co fin de destinalas a alugueiro a prezos vantaxosos entre a veciñanza.
A intención do goberno cabanés é executar unha serie de traballos de humanización e mellora da zona. A conselleira explicoulle que existen varias vías, como o Plan Hurbe ou a convocatoria dunha orde específica de axudas.
Tamén abordaron o futuro do desenvolvemento de solo industrial na parroquia de Nantón, e ratificaron os compromisos para delimitar unha área de alta capacidade industrial, tecnolóxica e comercial. M. LAVANDEIRA