Carballo involucra á rapazada na promoción do Día do Mercado
Nenos e nenas participaron nun obradoiro de cociña no que elaboraron menús saudables con produtos de proximidade
Carballo participou, un ano máis, na campaña internacional Quere o teu mercado, coa que se pretende apoiar, promocionar e visibilizar o papel dos mercados nas vilas, fomentando así a compra do produto local e a profesionalidade dos praceiros e praceiras.
Ademais do reparto do material promocional, a Concellaría de Feiras e Mercados, que preside Maruxa Suárez, complementou a celebración cun obradoiro de cociña saudable para a rapazada no propio Mercado Municipal. Participaron nenos e nenas de 6 a 10 anos, que se encargaron de elaborar e degustar menús saudables preparados con produtos de proximidades que se poden mercar na praza de abastos carballesa.
Despois de dous anos, a asociación WUWM (World Union of Wholesale Markets) recuperou esta iniciativa, que se desenvolve arredor do 27 de maio, Día do Mercado, e que en Galicia está promovida pola Dirección Xeral de Comercio e Consumo da Xunta en colaboración cos concellos.