Catro millóns para mellorar as infraestruturas de uso público
O Diario Oficial de Galicia (DOG) publicou este mércores, día 20, unha nova convocatoria da Orde de infraestruturas de uso público dirixida aos concellos para que poidan crear e mellorar infraestruturas, dotacións, instalacións e equipamentos vinculados á prestación de servizos municipais. No 2021 manténse o orzamento de catro millóns de euros, despois de que fose incrementado o pasado ano nun millón de euros.
Así o confirmou o vicepresidente primeiro da Xunta, Alfonso Rueda, durante a súa visita a Cabana de Bergantiños para supervisar os traballos acometidos no pavillón polideportivo de A Carballa cunha axuda autonómica de 40.000 euros.
Esta liña de axudas está dirixida aos concellos galegos de menos de 30.000 habitantes e con elas financiarase ata o 80 % do custe dos proxectos para os que se solicite a financiación, cun máximo de 40.000 euros para os municipios que presenten a solicitude de xeito individual e ata 50.000 € para aqueles que acometan iniciativas conxuntas.
En concreto, con estas subvencións os concellos poderán construir, ampliar ou mellorar as redes do alumeado público; parques infantís, incluíndo a posta en marcha de parques cubertos ou a cubrición dos xa existentes; así como edificios e dependencias municipais destinadas á prestación de servizos municipais e instalacións deportivas de uso público. Nestes espazos tamén se apoiará a mellora da accesibilidade e a dotación de equipamentos.
Unha das novidades na liña de axudas convocadas para o ano 2021 é que a Xunta primará os proxectos de accesibilidade aos edificios e instalacións deportivas municipais.
Rueda destacou na capital cabanesa o compromiso da Xunta por manter o apoio que precisan os municipios para levar a cabo actuacións que contribúan a mellorar a calidade de vida dos seus veciños e veciñas e, sobre todo, “a paliar as consecuencias económicas da crise sanitaria da COVID dos concellos en canto á prestación de servizos”.
O vicepresidente primeiro, que estivo acompañado polo alcalde de Cabana, José Muíño, e polo delegado territorial da Xunta na provincia da Coruña, Gonzalo Trenor, lembrou que a Administración autonómica leva investidos máis de 704.300 euros no municipio cabanés nos últimos anos. Un investimento que se centrou en melloras ambientais e de infraestruturas públicas, entre as que se inclúen as actuacións acometidas no pavillón polideportivo da capital municipal.
Os traballos foron financiados nun 61,33 % pola Xunta e contaron cun orzamento total de 63.223,91 euros. As intervencións que tiveron lugar no edificio que alberga o pavillón, a piscina climatizada e o ximnasio, ademais do auditorio municipal, centráronse no cambio das portas de acceso exteriores, a reposición dos canalóns de recollida das augas pluvais, o arranxo das cubertas e o cambio da tarima dunha das salas por outra máis resistente, de PVC, segundo informan dende o Concello de Cabana.
Ademais, instalaron canastas de minibasket e asentos nas bancadas, co obxectivo de favorecer e seguir promovendo a actividade deportiva entre a veciñanza deste municipio bergantiñán.
Alcalde de Cabana de Bergantiños
O alcalde de Cabana de Bergantiños, José Muíño, agradeceu a presenza tanto do vicepresidente primeiro da Xunta como do delegado territorial para dar a coñecer unha intervención “importante para o noso municipio, porque estamos a falar dunha instalación da que fan uso unhas oitocentas persoas, tanto nenas e nenos como maiores, e incluso, xente doutros concellos”. É por tanto, engadiu, trátase dun pavillón polideportivo convertido en “supramunicipal ou comarcal”.
Esta intervención “e para todas e todos, e quero agradecer que contaran coa nosa demanda, e agardo que proximamente poidamos frear a incidencia da COVID para que a veciñanza poida facer uso destas instalacións”, concluíu o rexedor.
Pola súa banda, o vicepresidente autonómico, Alfonso Rueda, agradeceu tamén “a acollida do alcalde para visitar esta intervención, unha obra que é moi significativa, xa que hoxe anunciamos unha nova convocatoria para o ano 2021 e destinada a concellos que desexen realizar actuacións como a que hoxe estamos a contemplar”, sinalou.
“Son os propios gobernos municipais os que mellor coñecen as necesidades da veciñanza e os que elixen sempre actuacións coas que, con pequenos investimentos, se pode chegar a moitas persoas”, remarcou.
A realidade é que, na maioría do casos, a economías dos concellos pequenos nunca estiveron sobradas de recursos, máis ben ao contrario, polo que sempre son benvidas as axudas das administracións superiores, como as deputacións ou a Xunta.
Sen estes apoios faríase moi complicado que estes municipios poidesen dispoñer de instalacións e servizos públicos que son imprescindibles para mellorar a calidade de vida dos seus veciñas e veciños. Ese é o caso do pavillón de Cabana, onde no só practican deporte nenos e maiores do municipio, senón que a instalación tamén é utilizada por veciños doutros municipios limítrofes, sobre todo a piscina e o ximnasio. Investir neste tipo de instalacións é tamén apostar pola saúde.