Contratados nove operarios na Laracha a través do Plan de Emprego Local
A Laracha. Os nove empregados municipais que o Concello larachés incorpora por un período de seis meses no marco do Plan de Emprego Local (PEL) 2022 impulsado pola Deputación formalizaron este martes os seus contratos. O acto estivo presidido polo alcalde, José Manuel López Varela, e o tenente alcalde, José Ramón Martínez.
En concreto son cinco peóns de obras e servizos, dous capataces e dúas traballadoras como persoal de servizos xerais os que se contraron para desenvolver traballos e intervencións de interese municipal. O proceso selectivo realizárase polo sistema de concurso-oposición, valorándose a experiencia profesional e a formación de cada candidato, ademais da realización dunha proba.
Os capataces e peóns formarán cuadrillas de obras e servizos. Encargaranse de actuacións como o mantemento de infraestruturas públicas, colocación de sinalización, reparación de beirarrúas e sumidoiros, acondicionamento do terreo para a ubicación de colectores, conservación medioambiental, limpeza viaria e apoio loxístico aos servizos municipais. O persoal de servizos xerais desenvolverá, principalmente, traballos de índole administrativa. M. LAVANDEIRA