Dous feridos nunha colisión de tres coches na AC-552 ao seu paso pola Laracha
En Cee, os bombeiros tiveron que limpar a estrada por mor dunha saída de vía dun vehículo que envorcou cando circulaba pola estrada local de Lires
Dúas persoas foron evacuadas polos servizos sanitarios tras resultar feridas nun accidente na Laracha no que se viron implicados tres vehículos. A colisión tivo lugar pasadas as 23.00 horas do martes no punto quilométrico 20 da AC-552, á altura de Torás, segundo informa o 112 Galicia.
Nada máis recibir a chamada de alerta por parte dos axentes da Policía Local, o 112 Galicia pasou aviso ao Servizo de Urxencias Sanitarias de Galicia-061 e informou aos Bombeiros de Bergantiños e aos efectivos da Agrupación de Voluntarios de Protección Civil da localidade larachesa.
Pola súa banda, os bombeiros de Cee tiveron que limpar a estrada por mor dun accidente no que un turismo envorcou na vía que comunica a capital ceense con Lires. Encargáronse tamén da regulación do trafico ata que chegaron os axentes da Garda Civil, dado que o coche estaba ocupando un dos carrís da estrada despois dunha curva.