Entregados os premios dos concursos de Nadal en Cabana
O Concello de Cabana de Bergantiños fixo entrega dos premios dos concursos ‘Crea a túa postal de Nadal’ e ‘Cantar e Contar’, que recompensaron a orixinalidade e calidade artística de todas as persoas participantes.
Os gañadores e gañadoras recibiron unha cesta personalizada de produtos típicos do Nadal. Este xesto pretende “seguir motivando a toda a veciñanza a participar nas iniciativas culturais que se promoven desde o Concello”, segundo explicou o goberno local.
No certame de panxoliñas de ‘Cantar e Contar’, o de María Gómez Mourelle foi seleccionado coma o mellor vídeo infantil, mentres que Marisol Gabín Martínez obtivo o galardón na categoría adulta. En canto á sección de tradición oral dese mesmo concurso, o xurado concedeulles a Sofía Souto Pose e a Ana Cancela Mato a distinción de mellor vídeo infantil e xuvenil, respectivamente.
Finalmente, en ‘Crea a túa postal de Nadal’ premiáronse os traballos de Carmen Ferreiro Varela, Noé Souto Pose e Alba Doldán Méndez, que, nesa orde, foron seleccionados como mellor postal infantil, xuvenil e para adultos.